Сунтаардар айылҕа харыстабылын туһунан кэпсэтиигэ көхтөөхтүк кытыннылар
Бүгүн Сунтаардааҕы айылҕа харыстабылын инспиэксийэтэ уонна административнай хамыыһыйа үлэһиттэрэ Тэҥкэ, Бордоҥ нэһилиэгин олохтоохторун кытта көрсүбүттэр. Бу туһунан Сунтаардааҕы айылҕа харыстабылын иниспиэксийэтэ, СӨ Айылҕа харыстабылын министиэристибэтин пресс-сулууспата иһитиннэрэллэр.
Сунтаардааҕы айылҕа харыстабылын иниспиэксийэтин үлэһиттэрэ көрсүһүүгэ мустубут дьоҥҥо айылҕа харыстабылын сокуоннарыгар, быраабылаларыгар саҥа уларыйыылары уонна административнай хамыыһыйа ирдэбиллэрин билиһиннэрбиттэр. Тыа сирин дьоно-сэргэтэ итини сыыска-буорга түһэрбэккэ болҕомтолоохтук истибиттэр уонна элбэх ыйытыылары биэрбиттэр, санааларын үллэстибиттэр. Нэһилиэнньэттэн суруктар төһө киирэллэрин уонна онно туох үлэлэр ыытыллалларын чопчуласпыттар. Маныаха улуустааҕы айылҕа харыстабылын иниспиэксийэтэ бары ыйытыыларга толору хоруйдары биэрбит. Холобур, Сунтаар нэһилиэгэр паарка хорчуоппатыгар уонна Бүлүү эбэ кытылыгар бөх быраҕыллыбытын туһунан батсаабынан киирбит сайабылыанньаҕа миэрэ тута ылыллыбытын иһитиннэрбиттэр. Бэрибиэркэ ыытан, буруйдаах дьону булан хомуйтарбыттарын, дьон-сэргэ итинник иһитиннэриини тута ыытара иниспиэксийэ үлэтигэр көмөлөөҕүн бэлиэтээбиттэр.
Дьон-сэргэ ирэ-хоро сэһэргэһииттэн, санаа үллэстиититтэн астынан тарҕаспыт.
edersaas.ru
+1
+1
+1
+1
+1
+1
+1