Олоҥхо дойдутунан аатырбыт Сунтаар улууһун киинигэр, Олоҥхо декадатын түмүктүүр ураты тыыннаах сонун кэнсиэр ыытылынна.
edersaas.ru
Ол курдук, ахсынньы 1 күнүгэр ыытыллыбыт кэнсиэркэ биир аймах дьоно-сэргэтэ ыллаан-туойан олохтоохтору, кэлбит дьону соһуттулар.
Олоҥхо дьиэтигэр олоҥхоһут Андреев Гаврил Андреевич- Куолай Өндүрүөй уола Бортунуой Хабырылла хос-хос сиэннэрэ, Социалистическай Үлэ Дьоруойа Андреев Дмитрий Гаврильевич сиэннэрэ, хос сиэннэрэ уонна СӨ үтүөлээх учуутала, уһуйааччы Николаев Егор Михайлович балтылара, бырааттара кэнсиэртээтилэр.
Дьоруой сиэнэ суруналыыс Гаврил Андреев «Эдэр саас» сайтка»:
— Ытыс саҕа быыкаайык Быычык диэн алаастан биһигин ыйаан, силистэнэн уус хомоҕой тыллаах олоҥхоһут Куолай Өндүрүөйтэн хаан сыдьааннанан, уола Андреев Гаврил Андреевич -Бортунуой Хабырылла, аата да ырылхайдык этэринэн, сайыннары-кыһыннары, ыйы-ыйдаан тигэр массыыҥкатын илдьэ сылдьан улуустары кэрийэн таҥас тигэрэ. Бортунуой 8 оҕолоох этэ. Ол иһигэр мин эһээм Социалистическай Үлэ Дьоруойа Дмитрий Гаврильевич Андреев. Бу дьоро киэһэҕэ олоҥхо, тойук куттаах аҕас-балыстыылар Туйаара Алексеева,
Александра Яковлева- Андреевалар,
Екатерина Данилова, кыыһа Татьяна Гаврильевна сиэннэрэ Валентина Архангельская, Зинаида Колесова,
Наталья Фефелова, мин уонна «Үнүгэсчээн», “Үрүйэчээн», “Айылгы» бөлөхтөрө кытыннылар.
Балтым Туйаара Аркадьевна туһунан ойуччу тутан бэлиэтиэм этэ. Ол курдук кини өрөспүүбүлүкэҕэ биир биллэр-көстөр тойуксут, олоҥхоһут. Сэтинньигэ «Олоҥхо үөрэҕэ» диэн үс күннээх улуустааҕы сэминээри тэрийэн ыыппыта. Сэминээргэ улуус уһуйааннарыттан уопсайа 50-ча иитээччи кыттан сахалыы ырыаҕа уонна олоҥхону толорорго үөрэммиттэрэ. Саха оҕото кыра сааһыттан омугун төрүт култууратыгар уһуйуллан улаатыахтаах дии саныыбын, — диэн кэпсээтэ.
Эһиил Бортунуой төрөөбүтэ 150 сылыгар сиэннэрэ, аймахтара түмсэн кэнсиэр тэрийэр былааннаахтар.
Кэнсиэртэн киирбит харчыны лиссиэй 10 кылааһын үөрэнээччитэ Снежана Федорова эмтэнэригэр анаан биэрбиттэр.
Түгэнинэн туһанан, Олоҥхо дьиэтин дириэктэрэ Мария Тараяроваҕа махталларын тириэрдэллэр.
Анивера Акимова, edersaas.ru