Ырыаҕа ылланар, хоһооҥҥо хоһуллар Сунтаар сирэ ырыаһыттарынан биллэр. Сунтаартан төрүттээх буоллуҥ да ырыаһытынан ааҕыллаҕын…
Мария КОБЕЛЬЯНОВА-ТУСКУЛААНА, edersaas.ru
Дьэ бу маны туоһулаан, өр кэмҥэ үлэтин тохтотон турбут ырыа айааччылар түмсүүлэрэ иккистээн сөргүтүлүннэ. Урукку кэмҥэ киэн туттар киһибит Валерий Коротов иилээн-саҕалаан кэлбит түмсүүтэ кини 65 сааһын бэлиэтиир күнүгэр иккистээн тыллыбыта киниэхэ күндү бэлэх буолла. Түгэнинэн туһанан, күндү киһибитин Валерий Васильевич Коротовы үбүлүөйгүнэн эҕэрдэлиибит уонна 60 сыл устата сыанаттан түспэтэх киһиэхэ «Сыана бэтэрээнэ» аат иҥэриллибитинэн эҕэрдэлиибит. Быйыл Сунтаар култууратын управлениетын көҕүлээһининэн, ырыа айааччылар түмүстэххитинэ табыллар диэн, хас да ырыа ааптарын, Сунтаар чаҕылхай сулуһун Анна Тотонованы үлэлээн көр диэн этии киллэрэн, саҥа салайааччынан кини ананна. Ырыа айааччыларбыт түмсэн, добун түһүлгэҕэ — Сунтаар нэһилиэгин култууратын киинигэр саҥа састаап улахан кэнсиэри бэлэх уунна.
Бу дьоро киэһэ алыптаах дорҕоонугар уйдаран сүрэхтиин, санаалыын астынныбыт. «Алгыспын аныыбын» диэн Сунтаарбытын Сунтаар дэтэр ырыанан кэнсиэр саҕаланна. Бу киэһээ бэйэлэрин ырыаларын Сунтаартан Валерий Коротов, Алексей Свидерскай, Виктория Николаева, Роман Амонов, Николай Тарасов, Дина Николаева, Мира Гуринова, Лилия Кириллина, Ефим Авелов, Күндэйэттэн Александр Степанов, Кэмпэндээйиттэн Ксения Евсеева, Анна Тотонова, Гаврил Пахомов, Тойбохойтон Клара Тихонова, Күүкэйтэн Валентина Архангельская, Степан Акимов, Түбэйтэн Архыып Румянцев, Сиэйэттэн Матрена Макарова, Хороттон Мичил Иннокентьев, Элгээйиттэн Анна Игнатьева, Бордоҥтон Мария, Василий Спиридоновтар, Владимир Федоров — Болдьумаар, Аллыҥаттан Марта Васильева — Алгыстаана анаатылар. Виктория Мойтохонова ырыатын «Мозаика», Варвара Максимова — Тырымнаайы ырыатын «Туллукчаан» оҕо сайдар киинэ, Маргарита Архипова ырыатын «Чебурашка» уһуйаан оҕолоро толордулар. Ырыа айааччыларга инники айымньылаах үлэҕитигэр истиҥ иэйиини, киһини долгутар кэрэ ырыалары!
Мария Кобельянова — Тускулаана,edersaas.ru сайтка анаан. Сунтаар.