close

Суол быһылаана тоҕо элбиирий?
Блогер колонката - Олох-дьаһах

Суол быһылаана тоҕо элбиирий?

Нэдиэлэ аайы дьон өлүүлээх суол саахаллара тахса тураллара киһини дьиксиннэрэр. Маныаха ханнык сүрүн төрүөттэр баалларын ырыттахха, «биир сүрүн төрүөтүнэн дьон арыгылаан баран уруулга олоруута буолар» диэтэхпинэ, сыыспатым буолуо.

edersaas.ru


Холобур, ааспыт өрөбүллэргэ ГИБДД үлэһиттэрэ 36 итирик туруктаах суоппары ыстарааптаатылар. Кинилэртэн үһэ иккистээн түбэспитэ сокуон өссө да сымнаҕаһын туоһулуур. Кинилэр бэйэлэригэр эрэ буолбакка, атын дьоҥҥо эмиэ кутталлааҕын билэр эрээрилэр, тоҕо син биир иһэ туралларый? Эппиэтэ биир: арыгы — наркотик кэриэтэ. Тоҕо диэтэххэ, ханнык баҕарар киһиэхэ бастакы үрүүмкэтиттэн саҕа­лаан, өйүгэр хатана сылдьыбыт туох баар хааччахтара өһүллэн киирэн бараллар. Итинник «эйфория» диэн турукка сылдьар суоппар бэйэтин саамай «крутой» курдук сананар. Били 1-2 үрүүмкэттэн тохтуох буолбут былаана барыта умнууга хаалар. Дьэ, ол кэннэ салгыы арыгылаан, уруулга олорон араас суол саахалыгар түбэһиитэ элбии турар.

Хомойуох иһин, үгүс киһи “арыгыны кыралаан, “култуурунайдык” иһии туох да куһаҕана суох, өссө сороҕор туһалаах” диэн сымыйа өйдөбүлгэ итэҕэйэн, суол саахалларыгар киирэн биэрэр.

Аны наука этэринэн, биир үрүүмкэ арыгы киһи хааныгар (ордук киһи мэйиитигэр уонна ууһатар, төрөтөр уорганнарыгар) 25 күҥҥэ тиийэ сылдьар. Ол түмүгэр суоппар массыынаҕа олорон оҥорор дьайыыларын, онно хардатын мөлтөтөр, тоҕо диэтэххэ, 3 күн иһигэр реакцията 50% диэри бытаарар эбит. Итинник суоппар чааска 100 км айаннаан иһэн, баара-суоҕа 50 км айаннаан иһэр курдук сананар. Онон, ыксал­лаах түгэн үөскээтэҕинэ, сөптөөх быһаарыыны кэмигэр ылбатыттан үгүс суол саахала тахса турар. Саамай дьиктитэ — ити түгэҥҥэ алкотестер бу суоппары өйдөөх курдук көрдөрүөн сөп.

Түмүктээн эттэххэ, хас биирдии суоппар массыынаны ыытар быраап ылыан иннинэ анал куурустары ааһыан наада. Итинник үлэ Саха сиригэр саҕаланан эрэрэ киһини үөрдэр.

Күндү саха киһитэ, арыгы – дьаат. Дьааты атыылаһыма, адьарайы аһатыма, инникигин сарбыныма!

Матвей ЛЫТКИН, «Трезвая Якутия» хамсааһын салайааччыта

#бүгүн: 1
3
0

Сайт матырыйаалларын ааптар көҥүлэ суох ылар бобуллар.

Мин санаам:

10 + 10 =