Бүгүн СӨ транспорын уонна суол хаһаайыстыбатын министиэристибэтин суолга сэрэхтээх буолуу уопсастыбыннай сэбиэтин мунньаҕа буолла. Мунньаҕы сэбиэт бэрэссэдээтэлэ Артур Алексеев иилээн-саҕалаан ыытта. Суолга саахал элбээбитэ кэпсэтии сүрүн боппуруоһунан буолла.
edersaas.ru
СӨ ИДьМ ССБГИС иһитиннэрэринэн, Өрөспүүбүлүкэ үрдүнэн саахал тахсара былырыыҥҥы сыллааҕы көрдөрүүттэн 5,4 %-нан үрдээбит. Быйылгы сылга уопсайа 885 суол быһылаана бэлиэтэммит. Онтон 98-һа дьон өлүүлээх, 1158-һа дьон эчэйиилээх буолбут. Саахал тахсааһына Дьокуускайга, Нерюнгрига, Сунтаарга, Үөһээ Бүлүүгэ, Горнайга, Усуйаанаҕа, Өлүөхүмэҕэ, Тааттаҕа уонна Уус Алдаҥҥа элбээбитэ бэлиэтэнэр. Оскуола оҕолоро суол быһылааныгар эчэйиилэрэ былырыыҥҥы көрдөрүүттэн 19,5 % үрдээбитэ боппуруоһу сытыырҕатар. Сэбиэт быһаарбытынан, саахал тахсыытын сүрүн биричиинэлэринэн суоппардар суол быраабылатын билбэттэрэ, массыына техническэй туругун көрүнүү мөлтөҕө, суол алдьаныыта уонна дьон суол быраабылатын тутуспата буолаллар. Кыһалҕаны быһаарар сыалтан, мунньах кыттыылаахтара хас даҕаны этии киллэрдилэр. Ол курдук, дьону таһар урбаан сокуонун кытаатыннарар, суол туругун тупсарар, дьон хаамар сирин эбии лаампалары туруоран сырдатар, оскуолаларга булгуччулаах «суол быраабылатын үөрэтэр» предмети киллэрэр, оҕолору кыра эрдэхтэриттэн суол быраабылатын тутуһарга үөрэтэр систиэмэ айар уонна оскуола оҕолоругар хараҥаҕа тыгар таҥастары, маллары булгуччулуур этиилэр киирдилэр.
Александр Архипов, СӨ ИДьМ ССБГИС салайаачытын эбээһинэһин толорооччу, полиция подполковнига:
— Суолга быһылаан тахсара олус элбээтэ. Ити кыһалҕаны быһаарарга ССБГИС салалтатын, үлэһиттэрин өттүттэн ыытыллар үлэ тиийбэт. СӨ бырабыытылыстыбата, СӨ транспорын уонна суол хаһаайыстыбатын министиэристибэтэ уонна СӨ ИДьМ ССБГИС бары бииргэ ылсан күүстээх миэрэ ылыннахпытына эрэ турбут кыһалҕаны кыайабыт.
Николай ПОПОВ, «Саха сирэ» хаһыат, edersaas.ru