Өрөспүүбүлүкэ үрдүнэн массыыналаахтар суол быраабылатын кэһэллэрин устар 18 камера үлэлии турар. 2017 сыл алта ыйын туругунан, ГИБДД анал киинигэр 40 тыһ. суоппар суол быраабылатын кэспиттэрэ хаартысканан уонна камеранан уһуллан «үйэтитиллибит».
Камералар турар сирдэригэр быраабыланы кэһии аччыыр эбит. Холобур, 2015 сыллаахха камералаах уулуссалар быһа охсууларыгар 135 СТБ (суол-транпортнай быһылаан) уонна суол быраабылатын кэһии тахсыбыта бэлиэтэммит буоллаҕына, 2016 сылга 25-кэ диэри кыччаабыт.
Анна Жегусова, ГАИ ыстаарсай иниспиэктэрэ:
– 2022 сылга диэри өрөспүүбүлүкэ үрдүнэн устар анал 67 камера туруоруллара былааннанар. 67 камераттан 37-тэ Дьокуускай куоракка, 30-та Нерюнгри, Алдан, Мэҥэ Хаҥалас, Хаҥалас, Мирнэй, Чурапчы, Нам, Горнай уонна Үөһээ Бүлүү улуустарыгар туруоруллуохтара.
Дьокуускай куоракка 18 уулусса быһа охсуһууларыгар туруохтаахтар. Балар суол быраабылатын кэһиитин эрэ буолбакка, уоруллубут тимир көлөлөрү судаарыстыбаннай нүөмэрдэринэн буларга эмиэ көмөлөһөллөр.
Камералар суоппардар светофор бобор уотугар айанныылларын, утары хайысхаҕа тахсалларын, уулуссалар быһа охсууларыгар баар балаһаны кэһэллэрин, аналлаах миэстэлэргэ дьону аһардалларын-аһардыбаттарын, сөптөөх түргэнинэн айанныылларын-айаннаабаттарын усталлар, быһаараллар.
Быйыл алтынньыга Дьокуускай куоракка камералар Дзержинскэй – Кальвица, Дзержинскэй – Строителлэр, Дзержинскэй – Лермонтов, Лермонтов – Петр Алексеев, Лермонтов – Киров уулуссаларын быһа охсууларыгар туруорулуннулар. Ый бүтүүтэ үлэлиэхтэрэ.
Александр ТАРАСОВ, «Саха сирэ» хаһыат, edersaas.ru