Ааспыт сыл бүтэһик күннэригэр Арассыыйа Суруйааччыларын сойууһун чилиэнэ Валерий Никифоров-Суор Уола “Түүҥҥү куо” кинигэтэ «Бичик» кинигэ кыһатыгар күн сирин көрдө.
Аан бастаан аан ситимҥэ айымньылара тарҕанан ааҕааччылар интэриэстэрин тардыбыт ааптар бу төрдүс кинигэтэ.
Филологическай наука кандидата, СӨ култууратын үтүөлээх үлэһитэ, араадьыйаҕа “Биһирэм тыл” биэриини 25 сыл устата ыыппыт Михаил Алексеев – Дапсы Суор Уолун айар үлэтигэр биэрбит сыанабылын билиһиннэрэбит.
ДАПСЫ:
«Харах уулаах кэпсээннэр»
400 ахсаанынан “Көмүөлгэ” тахсыбыт. Ол аата, кырата бибилэтиэкэлэргэ бэриллибит кинигэлэри аахпыт дьон ахсаанын барыллаабакка туран, 500-чэ киһи аахтаҕа. Оччо киһи ыраас хараҕын уута ыгыллан таҕыстаҕа, күөмэйэ бобуллаталаан ыллаҕа. Оннук куту уйадытар, дууһаны долгутар, уйулҕаны ууга-тыаҕа түһэрэр тыҥааһыннаах, күүстээх иэйиилээх кэпсээннэр. Кыра-кыра кэпсээннэр эрээрилэр, сырдыгы-хараҥаны, өлүүнү-өрүттүүнү охсуһуннарар, олоххо тардыһыннарар номохтоох эгэлгэ, дириҥ ис хоһоонноохтор, сырдык сандаар санаалаахтар. Хас биирдиилэрин үгүс үтүөтүн туһунан элбэҕи кэпсиэххэ сөп. Ону барытын хомуйа тардан, аҕыйах тылынан эттэхпинэ: кэпсээннэргэ туох буолара, дьон майгыта, тыла-өһө биир сиргэ тэпсэҥнээбэккэ, унньу-санньы барбакка, сулбу-халбы, кудуччу арыллан сайдар. Ааптар бэйэтин да, ойуулуур дьонун да саҥатын сиэринэн сып-сап, дьип-дьап.
“Суор Уолун суруйар майгыта, уратыта тугуй?” – диир буоллахха, улахан кыһалҕалары туруорар, улаханнык долгутар, элбэххэ үөрэтэр, элбэҕи толкуйдатар, дириҥник эҥсэр.
Суор Уолун дьон уратылаах майгытын ойуулааһын маастара дии саныыбын. Бу уонна бастакы да кинигэтигэр ойууламмыт дьон бары маарыннаспат майгылаахтар, тыллаахтар-өстөөхтөр. Олохтон ылыллыбыт хаама сылдьар тыыннаах дьон курдук, хараххар илэ көрөҕүн, саҥаларын илэ истэҕин.
Суруйааччы айымньыларын ис күүстэрин арыйар, уобараһы дириҥэтэр тутаах тыллары булан сатабыллаахтык туттарын, суолталаах ымпыгы-чымпыгы сатаан киллэрэрин сыаналыахха сөп. Киһи уустук, эндирдээх олоҕо алдьаныытын, көнүүтүн көрдөрөн итэҕэппэтэҕэ диэн суох. Суор Уолун алгыыбын!”
ЫСПЫРААПКА:
Валерий Иванович Никифоров-Суор Уола 1967 с. Үөһээ Бүлүү с. төрөөбүтэ.
2015 с. – “Сүгэһэр”,
2016 с. – “Харах уулаах кэпсээннэр”,
2017 с. – “Ол ыарахан кэмнэргэ” кинигэлэрэ бэчээттэммиттэрэ.
Надежда ЕГОРОВА, “Саха сирэ” хаһыат, edersaas.ru