Суоттуга ыытыллыбыт Анатолий Константинов кэриэһигэр өрөспүүбүлүкэтээҕи турнирга 69 бөҕөс күүһүн холосто

Бэҕэһээ, ахсынньы 7 күнүгэр, Уус Алдан улууһун Суотту сэлиэнньэтигэр көҥүл тустууга Саха сирин сэттэ, бэтэрээн-спортсменнар ортолоругар аан дойду икки төгүллээх чөмпүйүөнэ, тыа сирин спортсменнарыгар РСФСР уонна ССРС чөмпүйэнээтин кыайыылааҕа, Саха сирин уон төгүллээх чөмпүйүөнэ (7-тэ – көҥүл тустууга, 3-тэ хапсаҕайга), ССРС, Арассыыйа Федерациятын уонна Саха АССР спортарын маастара, СӨ үтүөлээх тириэньэрэ Анатолий Константинов төрөөбүтэ 65 сылыгар анаммыт көҥүл тустууга өрөспүүбүлүкэтээҕи турнир ыытылынна. edersaas.ru

Күрэхтэһии 62, 68, 74 киилэ ыйааһыннарынан барда, манна барыта 69 бөҕөс күүһүн холосто.

62 киилэлээхтэргэ 28 киһиттэн Ньургун Александров кыайыылааҕынан буолла. Арыйаан Тютрин уонна Степан Соркомов иккис, үһүс бириистээх миэстэлэргэ таҕыстылар.
68 киилэҕэ диэри ыйааһыҥҥа Эдуард Григорьев бастаата. Егор Пономарев – иккис, Петр Павлов үһүс буоллулар.
74 киилэҕэ Константин Власов тэҥнээҕин булбата. Тимур Николаев, Иван Барашков пьедестал иккис, үһүс үктэллэрин дабайдылар.

Хапсаҕайга 19 киһи кыттыбытыттан түмүк хапсыһыыга Айсен Копырины сабырыйбыт Константин Власов муҥутуур кыайыылаах аатын сүктэ.

Роман Попов, “Саха сирэ” хаһыат, edersaas.ru

Петр Павлов хаартыскаҕа түһэриитэ.