Суоттуга Ийэ пааматынньыгын арыйдылар

Ааптар: 
Бөлөххө киир:

Уус Алдан улууһун Суотту нэһилиэгэр Ийэ күнүгэр Дьоруой Ийэлэргэ аналлаах искибиэргэ “Сүгүрүй, Ийэҕэ” диэн өйдөбүнньүк-пааматынньыгы үөрүүлээх быһыыга-майгыга арыйдылар.

edersaas.ru

2010 сыллаахха Суотту нэһилиэгин дьаһалтатын көҕүлээһининэн Дьоруой Ийэлэргэ махтал бэлиэтин, кинилэр сырдык ааттарыгар сүгүрүйэр аналлаах   искибиэри оҥорон үлэҕэ киллэрбиттэрэ. Онно ытык мааны ийэлэрбит ааттара мрамор тааска суруллан, кинилэр сырдык мөссүөннэрэ үйэтитиллибиттэрэ. Билигин бу искибиэрбит нэһилиэк дьоно-сэргэтэ таптаан сынньанар, дьиэ кэргэн бэлиэ түгэннэрин бэлиэтиир ытык миэстэнэн буолла.
Быйыл Суотту сурукка-бичиккэ киирбитэ 250 үбүлүөйдээх сылыгар  Дьоруой Ийэлэр оҕолорун көҕүлээһиннэринэн, олохтоох дьаһалта тэрээһининэн нэһилиэкпитигэр  оҕотун көтөҕөн олорор Ийэ скульптурата оҥоһулунна.

Бу дириҥ суолталаах үлэни биһиги биир дойдулаахпыт, РФ Худуоһунньуктарын сойууһун чилиэнэ, РФ култууратын туйгуна, худуоһунньук-скульптор  Раиса Бурцева уонна айылҕаттан айдарыылаах талааннаах худуоһунньуктар  Григорий Портнягин кэргэниниин, СӨ  култууратын туйгуна, маастар Евдокия Яковлевналыын ылсан, айан-оҥорон таһаардылар.

Суотту нэһилиэгэ 16 Дьоруой Ийэлээҕинэн биллэр. Кинилэр элбэх оҕону төрөтөн, улаатыннаран, сүһүөхтэригэр туруоран, үтүө үлэһит дьон мааныта гынан иитэн таһаарбыттара. Дьоһун олоҕу олорон ааспыт ийэлэригэр, эбээлэригэр, хос эбээлэригэр бу күн кинилэр оҕолоро, сиэннэрэ, хос сиэннэрэ кэлэн өйдөбүнньүк-пааматынньыкка  сибэкки дьөрбөтүн уурдулар, махтал тыл бастыҥын эттилэр.

Биһиги, Суотту нэһилиэгин олохтоохторо, күн бүгүн ыччаттарын тапталларыгар бигэнэн, бочуоттаах сынньалаҥҥа  олорор Дьоруой ийэлэринэн Мария Кривогорницынанан,  Светлана Портнягинанан,  Розалия Охлопкованан    уонна элбэх оҕолоох күн күбэй ийэлэрбитинэн киэн туттабыт!

Ийэ сырдык уобараһын толору арыйар өйдөбүнньүк-пааматынньыгы арыйыыга бэрт элбэх киһи муһунна. Эҕэрдэ истиҥ  тылларын нэһилиэк баһылыга Василий Иванов, маастардар Раиса Бурцева, Григорий Портнягин, Дьоруой Ийэлэр оҕолорун ааттарыттан педагогическай үлэ бэтэрээнэ, СӨ үөрэҕириитин туйгуна, оскуолаҕа киириэн иннинэ саастаах оҕо тэрилтэтин педагог-психолога Анна Белолюбская, нэһилиэк дьокутааттарын сэбиэтин бэрэссэдээтэлэ Вера Татаринова эттилэр.
Ол кэнниттэн “Ийэҕэ махтал” аахсыйа-кэнсиэр ыытылынна. Онно нэһилиэк бары тэрилтэлэрин үлэһиттэрэ кыттыыны ыллылар. Киирбит үп Ийэ искибиэрин саҥардыыга уонна тупсарыыга туһуланыаҕа. 

Валентина БУБЯКИНА,

Уус Алдан улууһа.

«Саха сирэ» хаһыат, edersaas

Хаартыскаҕа Валерий Заровняев түһэриитэ.

+1
0
+1
0
+1
0
+1
0
+1
0
+1
0
+1
0