Суотту дьыалатыттан сиэттэрэн: хараҥаҕа уоту тэйитэр бэлиэлээх буолуу ирдэнэр
Бу дьыл алтынньы 14 күнүгэр Уус Алдан улууһун Суотту сэлиэнньэтигэр (Оҕуруоттаахха) оскуола оҕолоро эмсэҕэлээһиннээх улахан суол быһылаана тахсыбытын туһунан сайтпытыгар алтынньы 15 күнүгэр иһитиннэрэн турабыт.
СӨ ИДьМ-тын Суолга куттал суох буолуутун судаарыстыбаннай инспекцията (ГИБДД) онно биэрбит иһитиннэриитинэн, алтынньы 14 күнүгэр, киэһэ 22.15 мүн. саҕана Суотту 43 саастаах олохтооҕо «Тойота Гайа» массыынатынан алта оҕону (бастаан «сэттэ оҕо» диэн этэ) түҥнэри көппүт. Оҕолор оскуола дискотекатыттан төннөн, суол кытыытынан кэккэлээн хааман испиттэр.
Ити иэдээн түмүгэр, тохсус кылаас 15 саастаах үөрэнээччитэ сырдык тыына быстыбыт. Атын оҕолор эт-хаан эчэйиитин ылан, улуус киинин балыыһатыгар киллэриллибиттэр. Кинилэри кытта психологтар үлэлииллэр.
Быһылаан сириттэн куоппут буруйдаах суоппары полицейскайдар туппуттар. Алкотестерынан бэрэбиэркэлээбиттэрэ, 0,94 мг/л көрдөрбүт, ол эбэтэр, хааһы курдук итирик эбит.
Суоппары кытта массыына иһигэр өссө биир киһи баара биллэр. Кинилэр бу иннинэ өрүс кытылыгар олорон икки бытыылка буокканы испиттэр. Суоппар тутуллан баран, «суолга дьон баарын кыайан көрбөтөҕүм» диэн быһаарыы биэрбит.
Бу чахчынан РФ Холуобунай кодексатын 264-с ыст. 4-с чааһынан, ол эбэтэр, суол быраабылатын кэһии түмүгэр, итирик туруктаах сылдьан, киһини сэрэҕэ суохтан өлүүгэ тиэрдии бэлиэтэ баарынан, холуобунай дьыала тэриллибитэ.
Дьыаланы РФ Силиэстийэлиир кэмитиэтин Саха сиринээҕи управлениетын Чурапчытааҕы салаата силиэстийэлиир. Дьыала хаамыыта СӨ Борокуратууратын хонтуруолугар сылдьар.
Маныаха ГИБДД иһитиннэриитигэр «быһылаан буолбут уулуссатыгар сырдатыы суох, оҕолор бары хараҥа өҥнөөх таҥастаахтар, таҥастарыгар уоту тэйитэр бэлиэлэрэ суох» диэн бэлиэтээһин баара.
Анна Жегусова, СӨ ИДьМ-тын ГИБДД-тын ыстаарсай иниспиэктэрэ:
– 2015 сыл от ыйын 1 күнүттэн суол быраабылаларыгар уларытыылар киирбиттэрэ.
Ол олоххо киирбит уларытыылар ирдэбиллэринэн, хараҥа эбэтэр туох да үчүгэйдик көстүбэт кэмигэр (холобура, туманнаахха) суолу туорааһыҥҥа уонна кытыы сиринэн хаамарга, сатыы дьон уоту тэйитэр туох эмит маллаах эбэтэр бэлиэлээх буолуохтаах. Ити эбээһинэс.
Почталарга, канцелярскай, хаһаайыстыбаннай табаары атыылыыр маҕаһыыннарга уоту тэйитэр значоктар бааллар, сыаналара быһа холоон – 100 солк. буолааччы.
Маны таһынан, таҥас атыылыыр маҕаһыыннарга уоту тэйитэр лиэнтэлэр бааллар, ону оҕо кыһыҥҥы таҥастарыгар (кууркаҕа, ыстааҥҥа, соҥҥо) тигиэххэ сөп.
Вера МАКАРОВА, «Саха сирэ» хаһыат, edersaas.ru
Хаартыска: СӨ ИДьМ-тын пресс-сулууспата.