Биэнсийэ мунньуллубут чааһын харчынан ылыахха сөп (СУРАҔЫ ЧОПЧУЛААҺЫН)
Биэнсийэ пуондата мунньуллубут биэнсийэттэн уонна биир кэмнээх төлөбүртэн таһааран, 25 тыһыынчаттан элбэх суумалаах харчыны биэрэн эрэрин туһунан сурах социальнай ситимнэргэ киэҥник тарҕанна.
edersaas.ru
Онон, бу күннэргэ биэнсийэ отделениеларыгар хаһааҥҥытааҕар да элбэх киһи тоҕуоруспутун уонна төлөпүөнүнэн эрийэн ыйыталаһарын туһунан РФ Биэнсийэҕэ пуондатын Саха сиринээҕи отделениетын исписэлиистэрэ иһитиннэрдилэр.
edersaas.ru
Онон, отделение тустаах исписэлиистэрэ маннык быһаарыыны биэрдилэр:
Мунньуллубут биэнсийэни аныырга икки маннык түгэн сөп түбэһиэхтээх. Ол эбэтэр биэнсийэлээх киһи страховка биэнсийэтин ыларга бырааптаах уонна мунньуллубут биэнсийэҕэ угуллубут харчылаах буолуохтаах.
Мунньуллубут харчы сүрүннээн 1967 с. төрүөхтэргэ уонна онтон эдэр саастаахтарга, ону сэргэ биэнсийэни судаарыстыбаннай хос үбүлээһин бырагырааматын кыттыылаахтарыгар, Ийэ хапытаала сертификаттаах дьоҥҥо (кэлиэхтээх биэнсийэлэригэр ыыппыт буоллахтарына) баар.
Онтон биир кэмнээх төлөбүргэ биэнсийэ мунньуллуута барыта биир сууманан бэриллэр. Ол сууманы страховка биэнсийэтин ыла сылдьар дьон биэнсийэлэрин уопсай кээмэйдэриттэн мунньуллубут биэнсийэлэрин кээмэйэ 5 бырыһыан эбэтэр онтон кыра буоллаҕына.
Инбэлиитинэн эбэтэр аһатар-сиэтэр дьонун сүтэрбитинэн, страховка биэнсийэтин судаарыстыбаннай биэнсийэнэн ылааччылар (биэнсийэҕэ тахсар саастарыгар ыстаастара тиийбэккэ, кырдьаҕаһынан страховка биэнсийэтин ыларга быраабы ылбакка хаалбыттар) 55-60 саастарын туоллахтарына.
Мунньуллубут биэнсийэни анатарга сайабылыанньа (докумуоннарыҥ барыта баар буоллахтарына) – 10 күн иһигэр, онтон биэнсийэ суһал төлөбүрүн анатарга сайабалыанньа биир ый иһигэр көрүллэр.
Сайабылыанньаны көрүү түмүгүнэн бу төлөбүрдэри биэрэр эбэтэр аккаастыыр туһунан быһаарыы ылыллар.
Биэнсийэҕэ мунньуллууну судаарыстыбаннайа суох атын пуондаҕа оҥотторбуттар кинилэртэн ыйыталаһыахтаахтар.
Саха Өрөспүүбүлүкэтигэр Биэнсийэ пуондатын отделениета ханнык баҕарар иһитиннэриини бу аадырыска киирэн бэрэбиэркэлииргит наадатын санатар. Аадырыстара: www.pfrf.ru сайт, Facebook, VKontakte, Twitter курдук социальнай ситимнэргэ баар страницаларга. 8(4112) 45-00-59 нүөмэргэ эрийиэххэ сөп. Сайт «Хантаактар уонна аадырыстар» түһүмэҕэр киирдэххитинэ, биэнсийэ улуустааҕы уонна Дьокуускай куораттааҕы органнарын аадырыстарын булуоххут.
Надежда ЕГОРОВА, «Саха сирэ» хаһыат, edersaas.ru