Суруллубукка эргиллэн: Министиэристибэ эппиэтэ

Бөлөххө киир:

“Саха сирэ” хаһыат бэс ыйын 27 күнүнээҕи 25-c №-гэр “Социальнай тэрилтэ сабыллар кутталлаах” диэн ыстатыйа тахсыбыта. Ыстатыйаҕа Бүлүү улууһун Сыдыбыл нэһилиэгэр баар Н.С. Гоголев аатынан кырдьаҕастары, инбэлииттэри реабилитациялыыр отделение дьиэтэ мас буолан, баһаарынай ирдэбилгэ эппиэттээбэтинэн, сабыллар кутталлааҕын туһунан суруллубута.


Сыдыбыл олохтоохторо сылга 320 киһини чэбдигирдэр отделение сабылларын утаралларын туһунан эрэдээксийэҕэ суруйан ыыппыттара. Бүлүүтээҕи нэһилиэнньэни хааччыйыы кэлим киинин дириэктэрэ Юрий Тутукаров иһитиннэрбитинэн, улуус мунньаҕар боппуруос туруоран, дьокутааттар 3,5 мөлүйүөнү улуус бүддьүөтүттэн көрөн, тутууну саҕалыырга диэн быһаарбыттар. Ол эрээри, тутуу салгыы хайдах үбүлэнэрэ биллибэт.

 

“Үөрэтиллэ сылдьар боппуруос”

Суругу тутан баран, Үлэ, социальнай сайдыы министиэристибэтигэр официальнай ыйытык ыыппыппыт. Салгыы министиэристибэ, чуолаан миниистир Александр Михеев хоруйун тылбаастаан бэчээттиибит.

СӨ Үлэҕэ, социальнай сайдыыга министиэристибэтэ Бүлүү улууһун Сыдыбыл олохтоохторун суруктарыгар маннык хоруйдуур.

…Отделение 13 штатыгар 16 үлэһиттээх. Бу 16 үлэһиттэн 10 киһи – биэнсийэлээхтэр. Үлэһиттэр орто саастара – 52. Отделение мас дьиэтэ хамсаммат, кыаммат дьон олороллоругар, уоттан куттала суох буолуу ирдэбиллэригэр кыайан эппиэттэспэт.

2009-2015 сс. дьиэ баһаартан куттала суох буолуу ирдэбиллэригэр сөп түбэспэтин, ону туоратар туһунан барыта 7 дьаһал (предписание) тахсыбыта (15.09.2009 с., 19.11.2011 с., 28.12.2011 с., 29.10.2013 с., 14.10.2015 с.).

Билиҥҥи кэмҥэ Бүлүү оройуонун борокуруора Үлэ, социальнай сайдыы уонна Баайга-дуолга, сиргэ сыһыаннаһыылар министиэристибэлэригэр баһаартан куттала суох буолууга кэһиилэри туоратарга үбүлээһини хааччыйар туһунан ирдэбили (иск) түһэрбитинэн, Бүлүүтээҕи оройуоннай суут (27.12.2016 с.) быһаарыыта баар. Бу быһаарыы олохтоммут бэрээдэгинэн ааһыныыны ааспыта, ол эрээри СӨ Үрдүкү Суутун Судебнай коллегиятын Апелляционнай быһаарыытынан (06.03.2017 с., 12.07.2017 с.) уларытыыта суох хаалларыллыбыттара, апелляционнай үҥсүү толоруллубатаҕа.

Отделение дьиэтэ баһаартан куттала суох буолууга эппиэттээбэтинэн (5 степень огнестойкости), дьон олоҕор, доруобуйатыгар кутталы үөскэтэр усулуобуйалааҕынан, 2018 сыл ыам ыйын 11 уонна 15 күннэригэр оробуочай мунньахтар ыытыллыбыттара. Мунньахха улуус баһылыга С.Н. Винокуров, уопсастыбаннай түмсүүлэр бэрэстэбиитэллэрэ кыттыыны ылбыттара, отделениены сабыы туһунан боппуруос көрүллүбүтэ.

Мунньах түмүгүнэн маннык быһаарыылар ылыллыбыттара:

— СӨ Нэһилиэнньэ дьарыктаах буолуутун кэмитиэтин кытта биэнсийэҕэ тахса илик 6 үлэһиккэ үлэ миэстэтин булан биэрэргэ;

— Бүлүү улууһун инбэлииттэригэр Өрөспүүбүлүкэтээҕи инбэлииттэри социальнай-чэбдигирдэр кииҥҥэ бэриллэр квотаны улаатыннарарга;

— СӨ Уопсастыбаннай балаататыгар Бүлүү куоракка баран, социальнай хааччыйыы тэрилтэлэрин салайааччылара, уопсастыбанньыктар кыттыылаах мунньах тэрийэр туһунан ыҥырарга;

— Бу боппуруоһунан Үлэ, социальнай сайдыы министиэристибэтин Уопсастыбаннай сэбиэтин мунньаҕын тэрийэргэ.

Бүлүү улууһун баһылыга С.Н. Винокуров Халбаакытааҕы учаастак балыыһатын дьиэтин биэрэргэ этии киллэрбитин, үөрэтэ сылдьабыт.

Билиҥҥи кэмҥэ отделение үлэлиирэ-үлэлээбэтэ көрүллэ, үөрэтиллэ сылдьар боппуруос.

Миниистир А.П. Михеев”.

Бэлэмнээтэ Ангелина Васильева, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0