Суруналыыстар «Дуобукка» ситиһиилээхтик оонньоотулар

Ааптар: 
Бөлөххө киир:

Россия Бэчээтин күнүгэр анаан «Бичик» кинигэ кыһата уонна «Сахабэчээт» тэрилтэтэ тэрийэн ыыппыт, «Дуобукка» (дуобакка уонна уксааҥҥа) уһун уонна тыҥааһыннаах турнира ахсынньы 28 күнүгэр «Бэчээт дьиэтигэр» түмүктэннэ. Кэтэһиллибитин курдук, дьоҕурдаах, уопуттаах дуобатчыттар бу да көрүҥҥэ сытыы комбинациялардаах оонньуулары көрдөрдүлэр.

Бастакы, күүстээхтэр бөлөхтөрүгэр «Якутия» хаһыат фотограба, маастарга хандьыдаат Александр Назаров эрэллээхтик чөмпүйүөннээтэ, онтон кини сүрүн утарсааччыта, «Кэскил» хаһыат үлэһитэ эмиэ маастарга хандьыдаат Анатолий Павлов-Дабыл үрүҥ көмүс мэтээли ылары ситистэ. «Саха сирэ» хаһыат тылбаасчыта Николай Киприянов күүстээхтэргэ эрэ хотторон, боруонса мэтээли ылыан ылла.

Иккис бөлөххө үчүгэй бэлэмнээҕин биллэрэн кырдьаҕас суруналыыс Афанасий Максимов бастаата. Онтон күүстээх оонньооччулары кытта эрбии биитин курдук эрийсэн, «Чолбон» сурунаал редактора Иван Осипов-Уйбаан Ойуур иккис, «Кэскил» хаһыат сүрүн үлэһитэ Иван Андросов үһүс буолан, оонньуур таһымнара үрдээбитин биллэрдилэр.

Турнирга араас бириистэр көрүлүннүлэр. Ол курдук, Филипп Пестряков, Гаврил Попова — «Бастыҥ дебют», Владимир Сыромятников — «Уксааҥҥа бастыҥ ситиһии», Иван Андросов — «Күүстээхтэри кыайыы» хаһаайыннарынан буолан үөрдүлэр.

— Биһиги, 2005 сылтан ыла Бэчээт күнүн көрсө дуобат турнирын ыытабыт. Бу олус долгутуулаах, кэтэһиилээх күрэхтэһиини тэрийэн ыытарга эппиэтинэһэ улахан буолар. Быйыл өссө уксааны эбэн биэрдибит уонна «Дуобук» диэн ааттаатыбыт. Сорох саҥа оонньооччуларбыт долгуйан, бэйэлэрин кыахтарын ситэ туһамматылар дии санаатым. Ол да буоллар бары кыайыыга дьулуһа сатаабыттарын астынным, — диэтэ «Дуобук» турниры тэрийэн ыытааччы Филипп Пестряков.

Иван ОСИПОВ-Уйбаан Ойуур хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0