Аҕыйах хонуктааҕыта Индия Агра куоратыгар Үөрэнээччилэр бойобуой искусствоҕа – каратэҕа, тхэквондоҕа, тустууга, дзюдоҕа – Бүттүүн аан дойдутааҕы оонньуулара (COMBAT GAMES-2017) түмүктэннэ. Бу улахан түһүлгэттэн саха тустууга оскуолатын икки иитиллээччитэ – Александр Авелов (Ньурба) уонна Харысхал Григорьев (Сунтаар) туһааннааҕынан кыһыл уонна үрүҥ көмүс мэтээллээх эргилиннилэр.
Быйыл ыам ыйыгар Иркутскайга буолбут дойдуга бастыыр иһин күрэхтэһии иккис, үһүс призердарыттан таҥыллыбыт Арассыыйа хамаандата алта судаарыстыба кыттыылаах көҥүл тустуу түһүлгэтин кыайыылааҕынан тахсан, Улахан Кубок хаһаайынынан буолла. Саха сирин, Дагестан, Алания, Чечня эдэр бөҕөстөрө Араб Эмиратыттан, Индияттан, Францияттан, Кытайтан, Бразилияттан үөлээннээхтэрин илиилээх-атахтаах оҥорботулар, алта кыһыл көмүс, түөрт үрүҥ көмүс мэтээллэри ылан, хаардыы хаамтылар.
Бу дьоһун ситиһиигэ анаммыт пресс-кэмпириэнсийэҕэ Үрдүкү спортивнай маастарыстыба оскуолатын старшай тириэньэрэ Будимир Яковлев Оонньуулары үөрүүлээхтик арыйыыга Үөрэнээчилэр спортарын норуоттар икки ардыларынааҕы федерациятын (ISF Sport) бэрэсидьиэнэ Лоран Петринк, ISF генеральнай сэкирэтээрэ Ян Кулен кыттыбыттарын эттэ.
Онно Үөрэнээччилэр спортарын Индиятааҕы федерациятын бэрэсидьиэнэ, Пекиннээҕи Олимпиада боруонса, Лондоннааҕы Олимпиада үрүҥ көмүс призера, аан дойду чөмпүйүөнэ Сушил Кумар тыл этэригэр, аан дойдутааҕы таһымнаах күрэхтэһиигэ ыраах Саха сириттэн эдэр бөҕөстөр кытталларын бэлиэтээн эппит, көбүөргэ элбэхтэ тустубут мин доҕорум, аан дойду призера Леонид Спиридонов тириэньэрэ манна эмиэ баар диэн, Будимир Григорьевиһы туруоран мустубут дьоҥҥо билиһиннэрбит.
Ити түгэн Сушил Кумар үтүө киһитин, спортсменын сэргэ, Олимпийскай оонньууларга, аан дойдутааҕы түһүлгэлэргэ бииргэ тустубут дьонун истиҥник саныырын, саха бөҕөстөрүн туһунан үтүө өйдөбүллээҕин кэрэһилиир.
Роман Попов, “Саха сирэ” хаһыат
Ааптар хаартыскаҕа түһэриитэ.