Амма улууһун Болугур нэһилиэгэр хотон сууллубутун, дьон эчэйбитин туһунан сурах бүтүн өрөспүүбүлүкэни тилийэ көппүтэ.
„Болугур“ ТХПК хаһаайыстыбаннай ньыманан 120 ыччат сүөһүгэ анаммыт хотону алтынньы ортотуттан саҕалаан туппута. Алтынньы 20 күнүгэр кэпэрэтиип үлэһиттэрэ бэдэрээтчиккэ көмөлөһөн, субуотунньуктуу тахсыбыттара. Буор таһар тыраахтар халты тэбинэн, хотон каркаһын таарыйан мас сууллубута, сатахха өйөбүллэри тиэхиньикэ сылдьарыгар мэһэйдиир диэн ылан кэбиспиттэр эбит. Ол түмүгэр үс киһи араас өрүттээх эчэйии ылан, тута балыыһаҕа киллэриллибиттэрэ, кинилэртэн билигин балыыһаҕа биир киһи сытар, туруга этэҥҥэ. Биһиги Болугурга тиийбиппитигэр, хаһаайыстыба үлэһиттэрэ хотону чөлүгэр түһэрэн, салгыы тута сылдьаллара.
— Хотоммутун арыый кыччаттыбыт, 80-ча ыччат сүөһүнү киллэриэхпит, — диир кэпэрэтиип салайааччыта Михаил Ксенофонтов. — Улахан тымныы түһэ илигинэ, сэтинньи 10 күнүн ааспакка, бүтэриэхпит. Онуоха диэри субаннар урукку хотонноругар тураллар.
Амматтан Наталья Бубякина, “Саха сирэ” хаһыат, edersaas.ru. сайтка анаан.