Араас ойуулаах дьэрэкээн көбүөрдэр сэбиэскэй кэм саҕана кыахтаах ыал киэргэллэрэ буолаллара. Билигин дэлэйэн, соччо суолталаммат буолбуттар быһыылаах дии саныырым.
Онуоха баара, көбүөр туһуттан дьыалаҕа эриллэн, олоҕу алдьатыахха сөп эбит.
Ол курдук, Горнай улууһугар биир уопсай дьиэ хоспоҕуттан 1,2-1,5 м кээмэйдээх икки көбүөрү уорбуттар. 4 000 солк. суумалаах хоромньу тахсыбыт.
Полиция оперативниктара суһал-ирдиир тэрээһин кэмигэр уорбаланааччыны туппуттар — урут сууттана сылдьыбыт 50 саастаах дьахтар эбит.
Барыллаан быһаарыынан, дьахтар хоспох аана хатамматаҕын көрөн, иһирдьэ киирэн, көбүөрдэри сойботон тахсыбыт. Уонна биирин дьүөгэтигэр бэлэхтээбит, иккиһин бэйэтигэр хаалларыммыт.
Бу чахчынан «уоруу» ыстатыйанан холуобунай дьыала тэриллибит, буруйдаах 5 сылга диэри болдьоххо көҥүлэ быһыллыан сөп.
Бу туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.