Бүгүн, сэтинньи 3 күнүгэр Дьокуускайдааҕы индустриальнай-педагогическэй колледжка Уһук Илин эрэгийиэнигэр аан бастакынан сварщик идэтин таһымын үрдэтэр киин үөрүүлээх арыллыыта буолла.
Тэрээһиҥҥэ СӨ бырамыысыланнаһын уонна геологиятын миниистирэ Андрей Панов, СӨ Үөрэҕириитин уонна наука миниистирин солбуйааччы Михаил Присяжный, СӨ Нэһилиэнньэ үлэлээх буолуутун кэмитиэтин бэрэссэдээтэлэ Степан Москвитин, «Дьокуускайдааҕы сыбааркалааһын киинэ» ХЭУо дириэктэрэ Николай Терентьев уонна «Саха Өрөспүүбүлүкэтин тутааччылара» ассоциация генеральнай дириэктэрэ Айхал Габышев уонна да атыттар кыттыыны ыллылар.
Саха Өрөспүүбүлүкэтигэр исписэлиистэр идэлэрин таһымын үрдэтиигэ кэнники сылларга ирдэбил биллэ улаатта. Ити, элбэх саҥа бырайыактар үлэҕэ киирэннэр, үлэ миэстэтэ былдьаһык буолбутун иһин. Билигин бырамыысыланнас өрөспүүбүлүкэҕэ күүстээх сайдыыны ылан, сварщик курдук исписэлиистэр үлэлэригэр ирдэбил улаатта. Ол курдук, сварщиктар үлэлэрин хаачыстыбатын үрдэтэр соруктаах бу сыантыр тэрилиннэ. От ыйын 3 күнүгэр 2016 сыллаахха тахсыбыт » Идэ таһымын туохтан да тутулуга суох сыаналааһын» федеральнай сокуоҥҥа олоҕуран оҥоһуллубут сыантырдар араас эйгэҕэ үлэ хаачыстыбатын үрдэтэр соруктаахтар.
Үөрүүлээх арыллыыга СӨ Бырабыыталыстыбатын бэрэссэдээтэлин солбуйааччы Алексей Дьячковскай, СӨ Нэһилиэнньэ үлэлээх буолуутун кэмитиэтин бэрэссэдээтэлэ Степан Москвитин сыбаарканы боруобалаан көрдүлэр.
Степан Москвитин, СӨ нэһилиэнньэ үлэлээх буолуутун кэмитиэтин бэрэссэдээтэлэ:
— Дьокуускайдааҕы индустриальнай-педагогическэй колледжка сварщиктар идэлэрин таһымын үрдэтэр киин арыллыбыта олус туһалаах. Сварщиктар үлэлэрин хаачыстыбата тупсарын таһына, үлэлэрэ таһаарыылаах буоларыгар улахан хардыы. Үрдүк категорияҕа тахсыбыт сварщик былдьаһыкка сылдьар.
Николай Терентьев, «Дьокуускайдааҕы сыбааркалааһын киинэ» ХЭУо дириэктэрэ:
— Сварщик — худуоһунньук кэриэтэ киһи. Кини талааннаах эрэ буолбакка, кыһамньылаах буолуохтаах. Оччоҕо эрэ үчүгэй хаачыстыбалаах үлэни оҥорор. Хас биирдии киһи бэйэтин талаанын чочуйа сырыттаҕына сайдар. Биһиги кииммит оҕолору эрэ буолбакка, улахан дьону эмиэ сайыннарар соруктаах. Саха сирин сварщиктара идэлэригэр туйгун көрдөрүүлэнэллэригэр улахан хардыы оҥоһулунна.
Николай Попов, «Саха сирэ» хаһыат, edersaas.ru