Кэпэрэтиип уопсай мунньаҕар 2017 сыл түмүктэрэ бигэргэтилиннэ, быйылгы былаан ылылынна, саҥа салалта талылынна.
Бүлүү улууһугар үүт соҕотуопкатынан сүрүннээн «Сыа Бүлүү» кэпэрэтиип дьарыктанар. Нэһилиэктэрдээҕи сыахтар арыылыыллар, оттон улуус киинигэр баар собуот куорат таһынааҕы хаһаайыстыбалар үүттэрин астыыр. Кэпэрэтиип салалтата билиһиннэрбитинэн, ааспыт сыл устата 3,9 тыһ. т үүт соҕотуопкаланан, 131 т арыы уонна 912 т үрүҥ ас оҥоһуллубут. Үүт туттарааччыларга 175,6 мөл. солк, ол иһигэр 134 мөл солк. субсидия харчыта төлөммүт. Бу сылга хаһааҥҥытааҕар да элбэх, 46,2 т эт (39 т ынах этэ, 3,2 т сылгы этэ, 3,4 убаһа этэ) туттарыллыбыт. Өкүндүгэ баар эти астыыр пууҥҥа 124 ыччат сүөһү төлөһүтүллэн, 15,2 т эт туттарыллыбыт. Итинэн “Сыа Бүлүү” сылы 686 тыһ. солк. барыстаах түмүктээбит. Базаны хаҥатыы үлэтэ былаан быһыытынан ыытылар. Ол курдук, Үгүлээт, II Күүлэт, Тылгыны, Тааһаҕар сыахтара өрөмүөннэммит итиэннэ 650 кубометр иэннээх булуус тутуллар. “Сыа Бүлүү” быыстапкаларга көхтөөхтүк кыттар. Кэпэрэтиип йогурта өрөспүүбүлүкэтээҕи быыстапкаҕа бастакы степеннээх дипломунан наҕараадаламмыт буоллаҕына, суората “Россия 100 бастыҥ табаара” эрэгийиэннээҕи куонкурска бастыҥ табаар быһыытынан бэлиэтэммит! Кэпэрэтиип быйыл 4 тыһ. т үүтү, 39 т эти, 5 т балыгы, 3 т отону тутар, 120 ыччат сүөһүну уотууга туруорар былааннаах.
Мунньах кыттыылаахтара кэпэрэтиип Кэтээн көрөр сэбиэтин уонна бырабылыанньатын таллылар. Аҕыс сыллааҕыта улуус баһылыгын солбуйааччытыттан кэпэрэтиипкэ үлэлии кэлбит Алексей Кондратьевы кэлэр биэс сыл болдьоххо дириэктэринэн биир санаанан хаттаан талылллар.
Бүлүүттэн Николай Куприянов, Саха сирэ” хаһыат, edersaas.ru. сайтка анаан.