Тыйаатыр сылгыһытынан туолла
Василий НИКИФОРОВ, https://edersaas.ru
Дьокуускай куорат хабыллар хаба ортотугар турар Былатыан Ойуунускай аатынан Саха тыйаатырыгар толору мустубут сылгыһыттары Ил Дархан Егор Борисов Сылгыһыт күнүнэн эҕэрдэлээтэ. Сааскы салгын килэриччи сиэбит үлэ дьоно идэлээх күннэнэн, сирэйдиин-харахтыын сырдаабыкка дылылар.
«Аан дойдуга саамай элбэх сылгылаах – монголлар. Ол гынан баран, биһиэнин курдук тулуурдаах сылгы хайа даҕаны норуокка суох», – диэтэ Егор Афанасьевич уонна кэлиҥҥи сылларга сылгыһыт оруола үрдээбитин, сылгыттан ылыллар бородууксуйа сыаналанар буолбутун бэлиэтээтэ. Итиэннэ сэбиэскэй былаас сылларыгар сылгыбыт ахсаанын 204 тыһыынчалаах кирбиигэ тиэрдэ сылдьыбыппытын өрөспүүбүлүкэбит 100 сыллаах үбүлүөйүн көрсө 2022 сылга диэри ситиһэргэ туруорар соругун өссө чопчулаан эттэ.
Соругу толорорго саҥа базалары тутуу төрүт буолуо. Ил Дархан бу дьоро киэһэҕэ тоҕооһуннаран, 22 хаһаайыстыба салайааччытыгар 1-дии мөл. солкуобайдаах сертификаттары туттартаата. Кинилэртэн үгүстэрэ бааһынайдар. Харда тылы «Бөртө» сылгы собуотун дириэктэрэ Александр Павлов эттэ. Мантан салгыы сыл иһинэн аны 78 хаһаайыстыба көмө харчыны тутуоҕа.
Бэриниилээх үлэ бэлиэтэнэр
Тыа хаһаайыстыбатын уонна ас-үөл бэлиитикэтин министиэристибэтэ «Сылгыны үөрдээн иитиигэ үтүөтүн иһин» бэлиэни олохтоото. Бу наҕарааданы сыл ахсын Сылгыһыт күнүгэр бэриниилээхтик, таһаарыылаахтык үлэлээбит дьоҥҥо туттарыахтара. Миниистир Петр Алексеев илиититтэн бастакынан тутар чиэскэ тигистилэр: учуонай Николай Алексеев, консультант Ким Борисов, СӨ сылгыһыттарын сойууһун бэрэссэдээтэлэ Валерий Слепцов уонна сылгыһыттар Василий Леонтьев (Бүлүү), Андриан Нехоруков (Ньурба), Аммос Слепцов (Дьааҥы), Николай Новгородов (Уус Алдан), Василий Семенов (Үөһээ Бүлүү), Игорь Семенов (Сунтаар).
Мэҥэлэр – ат үрдүгэр
Тыа хаһаайыстыбатын академиятын ипподромугар сылгыһыттар идэлэригэр сыһыаннаах түһүмэхтэргэ күрэхтэспиттэригэр Мэҥэ Хаҥалас улууһуттан Хара нэһилиэгин хамаандата (үс уол) кыайыылааҕынан тахсан, «Беларус 320,4» мааркалаах тыраахтары сүүрдэн барда, Моорук уолаттара үһүс буоланнар скоростной от охсордоннулар. Иккис миэстэни Ньурба хоһууннара ыланнар, хас биирдиилэрэ МР полуавтомат саалаах дьиэлээтилэр. Барыта 17 хамаанда илин былдьаста.
Биирдиилээн түмүгү таһаарыыга аммалар аатырдылар: Николай Громов бастакы миэстэлэнэн, МР сааланна, Анатолий Баишев үһүстээтэ. Уус Алдантан Геннадий Атласов иккис миэстэлэннэ. Күрэхтэһиигэ сыаналаах бириистэри «Туймаада-Лизинг» хампаанньа, урбаанньыт Руслан Федотов, «Сахабулт» концерн, Дьокуускайдааҕы үүт собуота туруордулар.
Василий НИКИФОРОВ, https://edersaas.ru.
Мария ВАСИЛЬЕВА фотолара.