Ньурба улууһун борокуратуурата хамнас төлөөһүнүн туһунан сокуону тутуһуу хайдаҕын бэрэбиэркэлээтэ.
Ол бэрэбиэркэ быһаарбытынан, Ст. Васильев аатынан сылгы собуота РФ Үлэҕэ кодексатын ирдэбиллэрин кэһэн, 2016 сыл ахсынньы ыйыттан бу сыл от ыйыгар диэри кэмҥэ 22 үлэһитигэр 5 мөл. 556 тыһ. солк. сууммалаах хамнаһы төлөөбөккө сылдьар эбит.
Бу акционернай уопсастыба тыа хаһаайыстыбатын субсидияларыттан, атыылыыр бородууксуйатыттан дохуот киллэрэр эрээри, ону үлэһиттэрин хамнастыырга буолбакка, атын сыалларга, чуолаан, ороскуоттарын сабыыга, нолуок уо.д.а төлөөһүнүгэр туттан кэлбит.
Борокуратуура бэрэбиэркэ матырыйаалларын силиэстийэ уорганнарыгар ыыппытын түмүгэр, РФ Холуобунай кодексатын 145.1-с ыст. 1 чааһынан, ол эбэтэр, тэрилтэ салайааччыта тус интэриэһиттэн биитэр ымсыы санааттан үс ыйтан ордук кэмҥэ хамнаһы төлөөбөт буолуутун бэлиэтэ баарынан, холуобунай дьыала тэриллибит.
Бу туһунан СӨ Борокуратууратын пресс-сулууспата уонна РФ Силиэстийэлиир кэмитиэтин Саха сиринээҕи управлениета иһитиннэрдилэр.
Болҕойуҥ! Өскөтүн босуобуйаҕытын, биэнсийэҕитин, хамнаскытын уонна да атын ылыахтаах харчыгытын төлөөбөт буоллахтарына, борокуратуура биитэр силиэстийэ уорганнарыгар сайабылыанньа киллэрэн, бэйэҕит быраапкытын көмүскэниэххитин сөбүн умнумаҥ!
РФ Силиэстийэлиир кэмитиэтин Саха сиринээҕи управлениетын http://ykt.sledcom.ru сайтыгар биитэр Дьокуускай куорат Петровскай уул., 19/2 уонна СӨ Борокуратууратын http://proksakha.ru/ сайтыгар интэриниэт-приемнайдарыгар суруйуоххутун сөп.
Хаартыска: интэриниэттэн