Күн Дөһөгөй оҕото сылгыбыт –

Көмүстээҕэр күндү баайбыт,

Көс үйэттэн саханы салҕаабыт,

Көмүскэс тыыннаах таҥарабыт.

          Өбүгэлэрбит түҥ былыргыттан бүөбэйдээн аҕалбыт, ураты уустук айылҕалаах  дойдуга саха ыала тыыннаах хааларыгар күүс-көмө буолбут,  чысхаан тыаллаах тымныы кыһынтан, сайыҥҥы өҥүрүк куйаастан чаҕыйбат тулуурдаах, улгум айаннаах Дьөһөгөй айыы оҕото ырыынак хабыр сыһыаныгар харгыстанан симэлийбэтигэр үлэлэһэр дьүккүөрдээх хоһуун дьону Сылгыһыт күнүнэн эҕэрдэлиибин!

Саха омук дьиҥнээх эр киһитин тулхадыйбат хаачыстыбаларын – киэҥ-холку майгытын, ыарахаттартан чаҕыйбат тулуурун, төлкөлөөх муударай өйүн-санаатын, дьоҥҥо харыстабыллаах сыһыанын, тыа дьоно дохуоттаах үлэлээх, туруктаах олохтооох буолалларын туһугар ыытыллар кэскиллээх үлэни түстээччилэринэн эһиги, Саха сирин сылгыһыттара,  буолаҕыт!

           Күндү сылгыһыттар, төрүттэрбит үгэстэринэн кымыстаах чороону көтөҕөн тураммын,  эһиэхэ  чэгиэн-чэбдик туругу, кэнчээри ыччаттаргытыгар кэхтибэт кэскили, этэҥҥэ буолууну, дьолу-соргуну баҕарабын! Эһиги сылы эргиччи  элбэх сыраны-сылбаны эрэйэр, түҥ былыргыттан норуот селекциятынан иитиллэн кэлбит Дөһөгөйбүт оҕото айылҕаттан бэриллибит хаачыстыбаларын — томороон тымныыны тулуйар, уһун кыһыҥҥа бэйэтэ хаһан аһыыр, төрүүр-ууһуур дьоҕурдарын тупсарар сыаллаах племенной-селекциялыыр үлэҕит таһаарыылаах буоллун! Саха сылгытыттан ылыллар, киһи этигэр-хааныгар туһалаах аһы-үөлү бар дьоммут сандалытыгар дэлэтэргитигэр  алгыыбын!

   Александр ВАСИЛЬЕВ,

“Россия Аграрнай партията” Бүтүн Россиятааҕы политическай партия Саха сиринээҕи салаатын бэрэссэдээтэлэ.