Олунньу 21 күнүгэр Ил Түмэн уочараттаах пленарнай мунньаҕар «Сылгыны үөрдээн иитии туһунан» Саха Өрөспүүбүлүкэтин сокуонугар уларыылары киллэрэр туһунан» Саха Өрөспүүбүлүкэтин сокуонун бырайыага иккис уонна бүтэһиктээх ааҕыытыгар ылылынна.
Ол курдук, «Сылгыны үөрдээн иитии туһунан» сокуон 1-кы ыстатыйатын 4-с пуунугар «сылгыһыт» («коневод») диэн тыл «сылгыһыт-үөр сылгыны көрөөччү» (коневод-табунщик») диэн тыйыс айылҕалаах Саха сирин сылгыһытын уустук үлэтин уратыларын туһунан киэҥ өйдөбүлү биэрэр тылларынан солбуйулунна. Маны сэргэ быһаарар суолталаах пууннар киллэрилиннилэр. Холобур, «сылгы баазата» диэн олорор дьиэлээх-уоттаах, олбуоругар хараас, баанньык, сарай курдук хаһаайыстыбаннай тутуулардаах, сылгыны аһатарга-сиэтэргэ, саастарынан уонна аналларынан арааран көрөргө-истэргэ, зоотехническай итиэннэ эмтиир-сэрэтэр үлэни тэрийэргэ анал күрүөлэрдээх-хаһаалардаах, бүтэйдэрдээх, сылгыны тырааныспарга тиэйэр, тырааныспартан таһаарар эстакадалаах эбийиэктэр кэлим тутуулара ааттанар. Бу пуун ыраах учаастактарга сылгыһыттар олорор уонна үлэлиир усулуобуйаларын тупсаҕайдык тэрийэр туһугар үбүлээһини сөптөөх кээмэйинэн туруорсарга тирэх буолуоҕа.
Раиса Сибирякова, Саха сирэ” хаһыат, edersaas.ru.