Сымыйа сураҕы тарҕатымаҥ. ”WhatsApp” мөкү уонна үтүө өрүттэрин ырытыахха

Бөлөххө киир:

Икки сылтан бэттэх саха киһитэ үксэ «ватсаптанна». Биир киһи ортотунан уон-сүүрбэ бөлөххө баар: биир кылаастаахтар, биир куурустаахтар, бииргэ үлэлиир дьон, аймахтар, дьүөгэлэр, доҕоттор, биир интэриэстээхтэр, биир дойдулаахтар о.д.а. Ону таһынан, бииргэ ханна эрэ айаннаабыттар, туох эмэ тэрээһиҥҥэ кыттыбыттар эмиэ туспа бөлөх тэринэллэр. Сүбэлэһэргэ, ону-маны быһаарсарга олус табыгастаах, түргэн-тарҕан. «WhatsApp» үтүөтүн-өҥөтүн, мөкү өрүттэрин ырытан көрүөххэ.

«Сүүрбэ киһиэхэ ыыппатаххына…»

Күн аайы «WhatsApp» бөлөхтөрүгэр араас сонун, хартыына, алгыс, оннооҕор кырыыс аҥардаах тиэкистэр хаста да эргийэн кэлэллэр. «Бу суругу уон бөлөххө ыыппатаххына, эйигин түмүгэ көстүбэт эрэй-муҥ күүтэр, оттон ыыттаххына, сарсын дьол тосхойуо» диэн саанар ис хоһоонноох суруктары туппуккут буолуо. Тэҥнэһиэҥ дуо, харчыгын харыстаабакка, кутталы кытта тарҕатаргар тиийэҕин.

Суотабай оператордарга интернет элбэх мегабитын барыырыҥ – дьоҥҥо ыытарыҥ барыстаах. Хас биирдии «перепост» оҥордоҕуҥ аайы ороскуотураҕын. Хартыына, хаартыска, видео өссө элбэх мегабиты «сиир». Сарсыарда аайы «үтүө күнүнэн», киэһэ аайы «минньигэс түүллэри» диэн ис хоһоонноох хартыыналар хото тарҕаналлар.

«Мин суругум бэйэбэр төнүннэ!»

Сороҕор киһи итэҕэйиэ суох суруктарын ааҕа-ааҕа, «хайа иллэҥнээх киһи манныгы айара буолла» дии саныыгын. Дьиҥнээҕин-сымыйатын билээри бөлөхтөрүнэн ыытан туоһулаһаҕын. Дьон хараҕын далыгар сылдьар ырыаһыттар, артыыстар, спортсменнар тустарынан ону-маны айан тарҕаталлар. Биир сонун Саха сирин араас оройуоннарынан көрүөх бэтэрээ өттүгэр тарҕана охсор.

«Теория шести рукопожатий» диэбиккэ дылы, республика дьоно барыта алта киһи нөҥүө бэйэ-бэйэтин билсэрэ чахчы. Биһиги ону бэрэбиэркэлээри, эксперимент оҥордубут. Бэйэбит сымыйа сонун айаммыт бөлөхтөрүнэн ыыттыбыт. Сурукпут уонча мүнүүтэнэнэн бэйэбитигэр төнүннэ! Сымыйа сурахтары, араас хоһооннору тарҕатар дьон суруктарын элбэх киһи ааҕарыттан төһөлөөх астынара буолуой?! Бу кэлин уйулҕа ыарыытыгар кубулуйар.

Сүтэрбиккин булаҕын

«WhatsApp» ИДьМ холуобунай көрдөөһүн бырабылыанньатын үлэтин биллэ чэпчэппит буолуохтаах. Ол курдук, дьону элбэх харчыга албыннаан баран куоппуттары, күрүөйэхтэри, уоруйахтары “WhatsApp”-ынан хаартыскатын тарҕатан көрдүүллэр. Телевизорга, хаһыакка тахсар биллэриилэри нэһилиэнньэ барыта көрбөт, ол оннугар хас биирдии киһи төлөпүөннээх. Оттон сүппүт паспорт, дьиэ, массыына күлүүһүн, суумка, докумуон, кумааһынньык туһунан этэ да барыллыбат.

Уопсайынан, «WhatsApp» араас биллэриини тарҕатарга олус табыгастаах. Дьоҥҥо суһал көмө наада буоллаҕына, тугу эрэ атыылаары гыннаххына, бөлөхтөргө, доҕотторгор ыытаҕын.

ТОП-10: «WhatsApp» саамай тарҕаммыт суруктара

«Эдэр саас» хаһыат 2014 сыллаахха дьону аймаабыт, хастыы даҕаны барыйаааннанан тарҕаммыт сонуннары, хоһооннору, тиэмэлэри таһаарабыт. Үксүгэр дьон биллиилээх дьон, соһуччу түбэлтэлэр тустарынан сонуну эбэтэр күлүүлээх хоһооннору сөбүлээн тарҕатар эбит.

«Сиэйэ Уола киһини дэҥнээтэ»

vatsap-6

«Хара тириилээх Ньургуйаана уонна Артур Бурцевтар Саха сирин норуоттарын VI спартакиадатын чемпионнара»

vatsap-8

«Сиинэ оҕолорун өлүктэрэ көһүннэ»

vatsap-1

«Эрчим маҕаһыыны халаата»

vatsap-5

«Петр Старостин – Дыгын оонньууларын кыайыылааҕа»

vatsap-4«Стилист Василий Афанасьев Ирландияҕа буолар гей-парадка Саха сирин аатыттан кыттыаҕа»

vatsap-7«Олимпийскай чемпион Павел Пинигин Узбекистантан, Киргизияттан кэлбит омуктары «крышалыыр»

vatsap«Алдан, Нерюнгри оройуоннарыгар эһэлэр мэнээктээтилэр»

vatsap-10

Олимпийскай чемпион Виктор Ан туһунан араас хоһоон

vatsap-9Анастасия Сон дьыалата

vatsap-3

Манна даҕатан эттэххэ

Кыһалҕалаах, быһаарыыны эрэйэр дьыалалаах, ыйытыылаах буоллаххытына, «Саха сирэ» хаһыат «WhatsApp»-ыгар суруйуоххутун сөп. «Саха сирэ» хаһыат корреспонденнара төһө ькыалларынан эһиэхэ көмөлөһүөхтэрэ.

“WhatsApp” сурахтарын ysia.ru сайтка бэрэбиэркэлээҥ

“WhatsApp”-ынан тарҕанар сонуннары хаартыскалаах да буоллаҕына, итэҕэйэргэ ыарахан. Үксүгэр, куһаҕан сонуннар дьону сиилиир, балыйар ис хоһоонноохтор. Хомойуох иһин, бастакы суруйбут киһини булар ыарахан. Онон синбиир официальнай быһаарыыны көрдүүгүн.

“WhatsApp”-ка тахсыбыт суруктары «Якутское-саха информационное агентство» бэрэбиэркэлиир, тута дьиҥнээҕин таһаарар. Быһаарыыны бу аадырыска киирэн көрөҕүт: ysia.ru

Бэлиэтээн эттэххэ, сорох «сонуннар» дьиҥнээх курдук, араас сайтар ааттарыттан суруллубут буолар. Онон, түмүгэр ysia.ru диэн ссылкалаах, ааптар аата ыйыллыбыт сонуннарга итэҕэйиҥ.

+1
0
+1
0
+1
0
+1
0
+1
0
+1
0
+1
0