«Саха ыччатын — промышленноска» экспедиция кыттыылаахтара «ЛенскГаз» Отраднинскайга баар гааһы ыраастыыр, Ленскэй куоракка тиэрдэр сирин көрдүлэр. Гаас сир анныттан хостонон, ыраастанан, куоракка тиийиитин хааччыйар салаа салайааччыта Антон Гойда оҕолор боппуруостарыгар толору эппиэти биэрдэ. Кини: «Мин бу иннинэ Мирнэйгэ шахтага үлэлээбитим. 2009 сыллаахха манна кэлбитим. Туспа бөһүөлэк курдук олоробут. Вагон дьиэлэрбитигэр интэриниэттэн саҕалаан саунаҕа тиийэ барыта баар. Үлэбит олус эппиэтинэстээх,» — диэн кэпсээтэ.
Салгыы «Сахатранснефтегаз» АГРС салаатыгар сырыттыбыт. Оҕолору маастар Роман Кугданов үөрэ-көтө көрүстэ. Роман былырыын Сибиирдээҕи федеральнай университеты бүтэрэн, манна ананан үлэлии кэлбит эбит. Оҕолорго бэйэтин үлэтин туһунан, Красноярскаҋга хайдах үөрэммитин, онно туох идэлэр баалларын туһунан кэпсээтэ.
Регина Егорова, Н.М.Заболоцкай аатынан Томтор орто оскуолатын 10 кылааһын үөрэнээччитэ, Өймөкөөнтөн төрүттээх:
«СЫП-16» идэҕэ туһаайар экспедицияҕа сылдьарбыттан олус үөрэбин. Айаннаабыппыт 6 күнэ буолла. Бүгүн Ленскэйгэ «Сахатранснефтегаз»-ка сырыттыбыт. «Сахатранснефтегаз» хампаанньа эбийиэктэрин иһиттэн-таһыттан көрөн, олус элбэҕи биллибит-көрдүбүт. Газоконденсаты, гааһы бэлэмниир, хачайдыыр сыаҕы, билигин үлэлии турар 1-Т36 скважинаны, гааһы хостуур управление эбийиэктэрин көрдөрдүлэр, билиһиннэрдилэр.
Биһиги элбэҕи биллибит-көрдүбүт. Ити барыта өйбүтүгэр хатанан хаалыаҕа. Инники идэни таларбытыгар көмө буолуо дии саныыбын, Тоҕо диэтэргит, мин бырамыысыланнас өттүгэр барар баҕалааахпын. Өссө элбэх саҥа санаа, идея киириэ дии саныыбын.