close
Түүҥҥү Дьокуускай ыччаты айгыратар
ЭС-ыйытык

Түүҥҥү Дьокуускай ыччаты айгыратар

“Дьокуускайга дьол көрдүү”, “Дьоллоох Дьокуускай куорат” диэн тыл ситимнэрэ оччоттон-баччаҕа диэри төһөлөөх элбэх киһини кэрэҕэ, сырдыкка угуппуттара буолуой?! Сорохтор, кырдьык, киин куораппытыгар кэлэн ыал буолан, үлэлэнэн-хамнастанан, дьиэлэнэн-уоттанан, дьоллорун булаллар. Оттон атыттар ээл-дээл сылдьан, күүлэйи батыһан, олохтон үгүһү күүтэн, эрэммит дьоллорун билигин да булбакка сылдьаллар. Дьокуускайбыт үгүс ыччата түүҥҥү олоҕу биһириирэ кистэр буолбатах. Түүҥҥү күүлэйдээһиннэртэн дьол булуохпут диэбиттии, нэдиэлэ саҕаланыаҕыттан бээтинсэни күүтэллэр, күүлэйдии баралларыгар таҥас-сап атыылаһаллар, харчы ууруналлар…

Харчылаах эрэ киһи күүлэйдиир

Евгения, 28 саастаах, атыыһыт:

dengi-Урут оскулаҕа үөрэнэ сылдьан Дьокуускайга устудьуоннуу барарбын олус да күүтэрим. Төрүппүттэрбиттэн көҥүл босхо, бэйэм билбиппинэн аһаан-сиэн, таҥнан-симэнэн, күүлэйдээн, устудьуон бэһиэлэй олоҕун билиэм дии саныырым. Оччолорго оскуола үөрэнээччилэрин биэчэрдэрэ киэһэ уон чааска бүтэллэрэ, онтон киэһэ ханна да быкпаккын. Арай Дьокуускайга тиийдэхпинэ, түүҥҥү бэһиэлэй олоҕу билиэм диэн испэр ыраланарым. Онуоха оҥорон көрөр омуммар кулгаахпар: “Тула сырдыыр, сүрэх ыллыыр, тоҕо бэрдэй, үчүгэйэй, уоттаах түүҥҥү Дьокуускай!” — диэн ырыа тыллара өйбөр кутулла түһэллэрэ. Билигин мин баҕалаах Дьокуускайым биир үөрдүк үөрэҕин кыһатын ситиһиилээхтик үөрэнэн бүтэрдим. Бастаан куоракка кэлэрим саҕана түүҥҥү кулууптарга сылдьаталыырым, аһыы утаҕы да амсайан көрбүтүм. Оннооҕор биирдэ кулууптан тахсан истэхпинэ холуочук кыргыттар саба түһэн кырбаммытым. Оччотооҕу биэс-алта сыллааҕы куораттан билиҥҥи Дьокуускай түүҥҥү олоҕо таһыччы уларыйбыт эбит, харчылаах эрэ киһи сынньанар быһыылаах. Урут ый инниттэн харчы “быһан-отон”, мунньан-тараан ордорунар уонна бээтинсэ, субуота ахсын күүлэйдии барарбыт. Мунньубут-тараабыт харчыбыт элбээбитэ биир тыһ.солк. буолара. Билигин ол харчыга нэһиилэ биир суши нобуорун сакаастаан сиибит эрэ… Мээнэҕэ, туһата суохха харчы бараары эрэ күүлэйдиир туохха да наадата суох эбит. Ол кэриэтэ дьиэбэр ас астанан баран, доҕотторбун ыҥырыам. Түүҥҥү олохтон тэйбитим ыраатта, оскуола эрдэхтэн баҕарбыт күүлэйдээһиннэрим туохха да үчүгэйгэ аҕалбатахтара.

Хабалаҕа ыллардым

Николай, 30 саастаах, таксист:

hire-a-certified-seemagiclive-magician-for-casino-night-680x401— Мин харчыланным даҕаны түүннэри уоран үлэлиир автомакка, казиноҕа оонньуу барабын. Ыарыы дииллэрэ кырдьык эбит. Түүн буолла да үлэбэр курдук оонньуу барабын. Дьиҥэ, инженер үрдүк үөрэхтээхпин, син хамнастаах үлэлээх этим. Онно хамнаспытын наһаа өр туталлара, өр сордоон барар биэрэллэрэ. Ол иһин дьоммун иитээри бүтэһик харчыбын туппутунан казиноҕа тиийбитим. Бастакы сырыыбар 20 тыһ. солкуобайтан 150 тыһ. солкуобайга тиийэ үлүннэрбитим. Онно, кырдьык, маннык оонньоотохпуна харчыланыыһыкпын дии санааммын күн аайы өрө бара-бара оонньоон испитим, сүүйбүт харчыбын барытын сүүйтэрэн кэбиспитим. Ол кэнниттэн дьиэбэр баар сыаналаах малларбытын атыылаан харчылаһар буолбутум. Мин иэстэрбин сабаары кэргэним бэйэтин аатынан улахан суумаҕа кирэдьиит ылбыта. Ааспыт сылга диэри тулуйа сатаан баран, көнүө суох диэн, арахсан барбыта. Ол иһин билигин иэспин сабар, харчылаһар туһуттан күнүһүн куорат иһигэр таксилыыбын. Күнү быһа үлэлээбит харчыбын ол түүн тиийэн барытын автомакка, казиноҕа кутабын. Сороҕор ый баһыгар-атаҕар кыралаан сүүйэбин, ол эрээри үксүгэр хотторобун. Иэс бөҕөҕө ыйана сылдьабын, ону төлөөрү хаттаан оонньуу турабын. Быһата, сатаан босхоломмот хабалаҕа ыллардым.

Түүҥҥү кулууптан ыал буоллум

Светлана, 26 саастаах, учуутал:

klub— Өрөбүл күннэр үүнэллэрин күүтэбин аҕай. Бу күннэргэ дьүөгэлэрбин кытта рестораннары кэрийэбит, кальян сакаастыыбыт. Кальяны доруобуйаҕа туох да куттала суох дииллэр даҕаны чуолкайын билбэппин. Сорохтор наркотик да дииллэр. Хас нэдиэлэ ахсын саҥа кулууптар, рестораннар, караокелар, сауналар арыллаллар. Балары барыларын боруобалаан, саҥаттан саҥа миэстэҕэ сылдьарбытын ордоробут. Түүнүн күүлэйдиир туох да куһаҕана суох. Мин туох да улахан бэрээдэги кэһэр курдук санаммаппын, дьүөгэлэрбин кытта нэдиэлэтээҕи кэпсээммитин, сонуннарбытын, былааннарбытын үллэстэбит. Эдэр эрдэхпитинэ күүлэйдээбэтэхпитинэ аны хаһан маннык сылдьыахпытый? Үс сыллааҕыта түүҥҥү кулуупка биир уолу кытта билсибитим, салгыы билсэн-көрсөн ыал буолаары сылдьабыт.

Кулууптар ыччаты айгыраталлар

Ньургун, 29 саастаах, эргиэмсик, кэргэннээх, икки уол оҕолоох:

616737— Номнуо дьиэ кэргэннээх, дьиэлээх-уоттаах киһи өрөбүлбүн дьоммун кытта атаарбакка, доҕотторбун кытта күүлэйдии сылдьарым олуонатык көстөр. Ол эрээри, ааспыкка ый инниттэн былааннаан, кэллиэгэ уолаттарбын кучуйан күүлэйдии барарга сананныбыт. Эрдэ хамнаспыттан күүлэйдии барарбар диэммин “кырыйан-хоруйан” уурунан кэбсипитим. “Түүн оройо кулуупка көрсүөхпүт”, — диэн сүбэлэстибит. Дьэ, доҕоор, түүҥҥү кулууп диэннэрэ уларыйбыт даҕаны эбит! Тыаһа-ууһа даҕаны киһиттэн-таһынан улахан, аны киһи хайдах да хамсаныан билбэт муусукалара тыаһыыллар. Ону ол диэбэккэ итирбит уолаттар, кыргыттар уокка оҕустарбыт курдук сахсараҥнаһа сылдьаллар эбит. Эбиитин “биир пиибэни атыыластаххына иккиһин босхо ыл” диэн аахсыйа баар эбит. Номнуо үҥкүүлүүр кыахтарыттан ааспыт эрэттэр баарынай устуойкаҕа сөрүөстэн, ону кэтии-маныы, көрө-истэ олороллор эбит. Ыччат быыһыгар 50-60 саастаах дьахталлар, эр дьон эмиэ көстөллөр… Биһиги 2010 сыллар саҕаланыылара устудьуоннаан бүппүппүт. Ол саҕана, баҕар, түүҥҥү кулууптар саҥа арыллан, сайдан эрэр кэмнэрэ буолан буолуо, улахан туох даҕаны буруй, этиһии-охсуһуу тахсарын өйдөөбөппүн.
Дьокуускай куорат түүҥҥү олоҕо сыл ахсын сытыырхайан, сатарыйан эрэрин, сотору-сотору киһини өлөрбүттэрин, охсуспуттарын, уорбуттарын-халаабыттарн туһунан истэбит. Ыччат ыт-кус курдук өлөр. Ама да буолбутун иһин, маннык сирдэргэ киһи бэйэтин миэрэтин көрүнэн сылдьыахтаах. Хайаан да итириэхтээхпит, охсуһуохтаахпыт, кими эрэ кырбыахтаахпын, харчыбытын барытын барыахтаахпыт диэн кэтэх санаата суох. Ыччат санаата күүлэйгэ охтубутута олус хомолтолоох.

Айтана АММОСОВА

 

 

#бүгүн: 1
1
0

Сайт матырыйаалларын ааптар көҥүлэ суох ылар бобуллар.


Notice: Undefined index: comment_notes_before in /var/www/edersaas/wp-includes/comment-template.php on line 2334

шестнадцать − три =