Ыал, дьиэ кэргэн — оҕо төрүүр-үөскүүр эйгэтэ, оттон уһуйаан дьиэ кэргэҥҥэ сүбэһит-амаһыт. Онон ыал уонна уһуйаан икки ардыларыгар истиҥ сыһыан, өйдөһүү олохтонуута оҕо кэскилин түстүүр.
Бүлүү улууһун «Хатыҥчаан» уһуйаана эһиил оҕо тэрилтэтэ буолан үлэлээбитэ 50 сыла буолар. Уһуйааҥҥа 32 үлэһит оҕолорбутун иитэн-такайан, үөрэх киэҥ эйгэтигэр атаараллар, үс бөлөххө биирдэриттэн сэттэтигэр диэри сэттэ уонча оҕо сылдьар.
Уһуйааммыт үлэһиттэрэ бары анал үөрэхтээхтэр, 100 бырыһыан хаачыстыбаҕа үлэлэһэллэр. Былырыыҥҥыттан эдэр эрчимнээх үлэһит Александра Анатольевна Егорова сэбиэдиссэйинэн ананан үлэлиир. 2018 сыл дойду үрдүнэн Үтүө дьулуур сыла (Год добровольца) биллэриллибитэ. Ол чэрчитинэн дьиэ кэргэн оҕону иитэр оруолун үрдэтэргэ, нэһилиэнньэни уһуйаан олоҕор чугаһатарга Александра Анатольевна уонна уһуйаан үлэһиттэрэ бука бары биир сыал-сорук туруорунан үлэлиибит. Ол курдук, балаҕан ыйыттан күһүҥҥү үлэлэр саҕаланнылар. Төрөппүтү кытта биир санаанан түмсэн уһуйааммыт таһын тупсарыы, оҕолор оонньуур былаһааккаларын сэргэхситии, отонноох талахтары, мастары олордуу көхтөөхтүк ыытылынна. Маны таһынан, уулуссаны ыраастааһыҥҥа, уһуйаан ис-тас көстүүтүн тупсарыыга, саҥа олбуор тутуутугар төрөппүттэр, үлэһиттэр бары турунан үлэлэстилэр, көмөлөстүлэр. Бу барыта оҕону кэрэҕэ, үлэҕэ кыра сааһыттан уһуйарын төрөппүттэр өйдүүллэр, сыаналыыллар.
“Хатыҥчаан” уhуйаан үлэһиттэрэ төрөппүтү кытары сүбэлэрин холбоон, таһаарыылаахтык үлэлииллэр.
Вероника ЛОБАШЕВА, «Саха сирэ» хаһыат, edersaas.ru саайтка анаан