Өйдөөн көрбүтүм, 2017 сылбыт кээрэнэн бүтэрэ бу аҕыйах хонук хаалбыт эбит. Сааһырдахха сыл-хонук ааһара түргээтиир дииллэрэ чахчы быһыылаах. Соторутааҕыта аҕай ыһыахха үөлээннээхтэрбин кытары оһуохайдаан ойо-тэбэ сылдьыбыт курдугум…
Эмээхсиним бүгүн хантан эрэ эргэ дьыл тиһэх күнүгэр Бастакы ханаал “Ирония судьбы…” киинэни аны көрдөрүө суоҕун туһунан истэн кэлбит. Атын кыһалҕа суоҕар дылы, күнү супту ол туһунан мээрэлээн таҕыстаҕа үһү. Эбиитин төлөпүөнүнэн дьүөгэлэрин салгытта бадахтаах, бэл куоскатыгар үҥсэргээн эрэрэ. Буолумуна, биһиги дьиэ кэргэҥҥэ оливье салааты, сибиэһэй тоҥ былыгы, уоттаах харыйаны сэргэ бу Эльдар Рязанов хартыынатын көрүү Саҥа дьылы көрсөр бырааһынньыкпыт биир кэһиллибэт үгэһинэн буолбута ыраатта эбээт…
Мин эмээхсин хараҕыттан дьалты буолан, бэлэмнээбит харыйа оонньуурдардаах хоппобун муннукка анньан, куолубунан хоспор бүгэммин кыра кийиитим аҕалбыт хаһыаттарын көрүтэлиибин.
Үүнэр сылга көрбүөччүлэрбит Тиһэх тыһыынча буолуо суоҕа диэбиттэр. Арай Азияҕа улахан уу мотуога туруоҕун, киһи-аймаҕы биллибэт ыарыы сутуйуоҕун, улахан вулкан эстиэҕин, сайын АХШ-ка сүүнэ метеорит түһүөҕүн сылыктааабыттар. Аны туран Rogers Holdings хампаанньа тойоно, миллиардер Джим Роджерс үүнэр сылга аан дойдуга үп кириисиһэ ааҥныа диэн билгэлээбит. Олорбуппут сыччах диэтэҕиҥ…
Соҕуруу улахан куораттарга кырачааннар уһуйааннарыгар мантан антах Тымныы оҕонньор анал лисиэнсийэтэ суох бытыгын да быктарыа суоҕа диэбиттэр. Бука эрэ, баата бытыктаахтартан хааһыналарын хаҥатаары оҥоһуннахтара. Оттон сорох куораттар былаастара Тымныы оҕонньору оҕо саадтарыгар ыҥырары кыккыраччы боппуттар. Сураҕа, оннук дьаһанан хоруупсуйа көстүүлэрин утары охсуһаллар үһү. Дьэ буолан истэҕэ…
Хайыы, оттон бу били күндүркэтэр киинэбитин ахсынньы 31-гэр “Россия-1” ханаал көрдөрөр эбит буолбат дуо! Ол иһин даҕаны, хайаан “Иронията…” суох Арассыыйаҕа Саҥа дьыл үүнүөй. Бэйи, булбут сонуммунан эмээхсиммин уоскутуум. Бээ-бээ, харыйабытын бүгүн симиирбит дуу, сиэннэрбит кэлэллэрин күүтэрбит дуу…