Дьокуускай куорат федеральнай суута СӨ Үлэҕэ судаарыстыбаннай иниспиэксийэтин урукку начаалынньыга Лариса Березовскаяҕа бэрт сымнаҕас бириигэбэр таһаарбытын YakutiaMedia ИА (yakutiamedia.ru) иһитиннэрдэ.
Вера МАКАРОВА, «Саха сирэ» хаһыат, edersaas.ru
Суут быһаарбытынан, 2015 сыл бүтүүтүгэр РФ Куттал суох буолуутун федеральнай сулууспатын Саха сиринээҕи управлениета (УФСБ) Березовскаяны бүддьүөт үбүн-харчытын хорон сиэһиҥҥэ уорбалаабыт, «Түөкүннээһин» ыстатыйанан холуобунай дьыала тэрийбит. Бу чунуобунньук сокуоннайа суох дьайыытын түмүгэр, 2 мөл. солк. суумалаах хоромньу тахсыбыт.
Үлэ кылаабынай иниспиэктэрэ уһун кэм устатыгар сорох үлэһиттэригэр, ол эбэтэр, бэйэтэ үлэҕэ ылбыт аймахтарыгар уонна доҕотторугар, ый аайы бириэмийэ суруйа сылдьыбыт. Ол бириэмийэ улахан аҥаарын бэйэтигэр ылар эбит.
Маны таһынан, үлэһиттэрэ хотуннарын кытта үчүгэй сыһыаны буортулаамаары, харчыларын кини кэбиниэтигэр аҕалан биэрэллэр эбит.
2015 сыл ахсынньы ыйын саҥатыгар Лариса Березовская Москва куоракка үлэ иниспиэктэрдэрин кэллиэгийэтин мунньаҕар көтөөрү сылдьыбытын, Роструд хамыыһыйатын бэрэбиэркэтэ кэлэн, кыайан барбатах.
Ол улахан бэрэбиэркэ түмүгэр, 2015 сыл ахсынньы 17 күнүгэр Дьокуускай куорат федеральнай суута Березовскаяны дуоһунаһыттан уураппыт.
Суут Лариса Березовскаяны РФ Холуобунай кодексатын 159-с ыст. 3-с чааһынан («Түөкүннээһин») уонна 285-с ыст. 1 чааһынан («Дуоһунас боломуочуйатынан туһаныы») буруйдааҕынан билинэн, 2 сыл усулуобунай миэрэнэн накаастыырга уонна 15 тыһ. солк. суумалаах ыстараап төлүүргэ уурбут. Итиэннэ үс сылга салайар дуоһунастарга үлэлиир быраабын быспыт.
Судьуйа Анатолий Каратаев бириигэбэр таһаарарыгар, түөкүн дьахтар сокуоннай сааһын ситэ илик оҕолооҕун, буруйун ис сүрэҕиттэн толору билиммитин, кэмсиммитин, эмсэҕэлээччилэргэ оҥорбут хоромньутун бэйэ баҕатынан төлөөбүтүн уонна бырабыыталыстыбаттан элбэх наҕараадалааҕын учуоттаабыт.
Бириигэбэр бүгүн, муус устар 25 күнүгэр, сокуоннай күүһүгэр киирбит.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.