Түүкээн үрэҕи туоруур муостаны Иркутскайдааҕы «Проектно-изыскательная компания» ХЭУо тутуоҕа. Ол курдук, «Бүлүү суола» управление былырыын күрэх биллэрбитин түмүгүнэн, Иркутскай хампаанньата кыайыылааҕынан таҕыста.
edersaas.ru
Билигин «Бүлүү» федеральнай суолга сааскы-сайыҥҥы уонна күһүҥҥү өттүгэр Оччугуй Ботуобуйаҕа уонна Түүкээҥҥэ понтуон-муоста тэлгэтиллэн, айан-сырыы тохтообот. Түүкээн – Бүлүү өрүс хаҥас салаата. Бу үрэҕи туоруур муостаны тута сатаабыттара быданнаата. Ол эрээри үп-харчы боппуруоһа кыаллыбакка, боппуруос салгыҥҥа ыйанан турбута.
Иркутскайдааҕы хампаанньа муостаны уонна муостаҕа киирэр суолу 1 млрд 838 мөл. 587 тыһ. 423,96 солк. иһин тутуоҕа. Муоста 267,35 миэтэрэ уһуннаах буолуохтаах.
Хаартыска: интэриниэттэн
Анивера АКИМОВА, edersaas.ru