Холуонньаларга бобуулаах маллары киллэриини сэрэтэр үлэ салҕанан барар. Ол курдук, оннук хас да чахчы булулунна.
Дьокуускайдааҕы 1 №-дээх кытаанах эрэсиимнээх холуонньа олбуорун таһыгар скотчунан кэлгиллибит саһархай өҥнөөх бакыаты буллулар. Онно 5 суотабай төлөпүөн, 4 төлөпүөнү ииттэрэр тэрил итиэннэ 4 гарнитур бааллар эбит. Бу бобуулаах маллары кимнээх эрэ олбуор нөҥүө быраҕаары былааннаабыттара кэмигэр бохсуллан, сатаммата.
Оттон Үөһээ Бэстээхтээҕи 3 №-дээх уопсай эрэсиимнээх холуонньаҕа уһун сыбыдаанньаҕа кэлбит К. диэн дьахтар тус малларын бэрэбиэркэлээһин кэмигэр майонез бааҥкатыгар кистэмит 5 суотабай төлөпүөнү, 200 г доруоһаны, 2 ииттэрэр тэрили, ону таһынан, суотабай төлөпүөҥҥэ аналлаах аккумуляторнай батареяны булбуттар.
Оттон Мохсоҕоллооххо баар 6 №-дээх кытаанах эрэсиимнээх холуонньаҕа буруйун боруостаан олорооччуга чочунаах иһигэр кистэммит 5 сим-каартаны, ону тэҥэ, суумка ис сиэбигэр кистэммит суотабай төлөпүөнү тиэрдэ сатаабыттара кыаллыбата.
Бу чахчыларынан административнай сокуону кэһии туһунан матырыйааллар толоруллан, мировой суукка ыытылыннылар. Ону сэргэ, ис бэрэбиэркэ барар.
Бу туһунан РФ Накаастабылы толорор федеральнай сулууспатын Саха сиринээҕи пресс-сулууспата иһитиннэрдэ.
Накаастабылы толорор управление санатар: РФ Административнай кодексатын 19.12-с ыстатыйатынан буруйдаммыт киһи 3 тыһ. солк. — 5 тыһ. солк. суумалаах ыстараап төлүүрүн ааһан, ити аҕалбыт малларын, бородуукталарын былдьатар.
Биһиги корр., «Саха сирэ» хаһыат, edersaas.ru
Хаартыскалар: РФ Накаастабылы толорор федеральнай сулууспатын Саха сиринээҕи пресс-сулууспата.