2016 сылы Мэҥэ Хаҥаласка – Физическэй култуура уонна спорт сылынан биллэрэн, ол чэрчитинэн улууска киэҥ хабааннаах элбэх үлэ ыытылынна. Ол биир туоһутунан сэтинньигэ улуус биир улахан нэһилиэгэр Төҥүлүгэ Тустуу саҥа саалата үөрүүлээхтик аһыллыбыта. Манна тренердэринэн эдэркээн уолаттар Семен Десяткин уонна Иван Белолюбскай үлэлииллэр.
Манна даҕатан эттэххэ, Иван Белолюбскай – 2008 сыллаахха “Азия оҕолоро” норуоттар икки ардыларынааҕы спортивнай оонньуу үһүс призера, уолаттарга Россия күрэхтэһиитин кыайыылааҕа уонна икки төгүллээх боруонса призера, Белоруссияҕа, Украинаҕа, Турция ыытыллыбыт турнирдар призердара. Билигин Чурапчытааҕы физическэй култуура уонна спорт институтугар кэтэхтэн үөрэнэр.
Мин киниттэн үлэ-хамнас хайдах саҕаламмытын туһунан ыйыталастым.
-Дорообо, үлэ үчүгэй, саҥа саалаҕа киирэн үлэ күөстүү оргуйда, өссө интэриэһинэй буолла, — диэн Иван кырдьык, үөрбүт санаатын биллэрэр.
-Эрчийэр оҕоҕут хаһый?
-Саалаҕа 40 оҕо дьарыктанар, ону таһынан чугастааҕы Таратка, Тумулга 10-нуу оҕону дьарыктыыбыт. Күнтэн-күн ахсын эрчиллэр оҕобут ахсаана эбиллэн иһэр. Саҥа саала оҕону угуйар, тардар эбит диэн астынабыт.
-Кэлин ханна күрэхтэстигит? Туох ситиһиилэннигит?
-Аан дойду уолаттарга бастакы чөмпүйүөнэ Илларион Федосеев бирииһигэр оҕолорго өрөспүүбүлүкэтээҕи турнирга 2008 сыллаахтарга Антон Кандинскай (22 кг), 2006 сыллаахтарга Рамиль Егоров (26 кг) уонна 2004 сыллаахтарга Айаал Соловьев (26 кг) бастакы, 2005 сыллаахтарга Саша Птицын (26 кг) иккис, 2006 сыллаахтарга Айсен Слободчиков (28 кг) үһүс миэстэлэммиттэрэ. ССРС спордун маастара Семен Макаров бирииһигэр 2002 сыллаахтарга Кеша Шелканов (54 кг), Стас Свинобоев (58 кг) бастакы уонна 2002 сыллаахтарга Миша Птицын (46 кг) үһүс буолбуттара. Оттон Дьокуускайга Егор Черкашин аатынан “Сибойл” тэрилтэ бирииһигэр Айаал Соловьев (26 кг) кыайыыны ситиспитэ. Ити курдук, кыралаан ситиһиилэр кэлэн иһэллэр.
-Чугастааҕы кэмҥэ туох былааннааххытый?
-Чэппиэргэ үс уолбут Нерюнгрига, Уһук Илиннээҕи турнирга кытта барда. Кинилэр устунан Новосибирскайга Бүтүн Россиятааҕы турнирга кыттыахтара уонна Красноярскайга буолар Иван Ярыгин аатынан норуоттар икки ардыларынааҕы Гран-при турниры илэ харахтарынан көрүөхтэрэ.
Эдэр тренердэр Иван Белолюбскай уонна Семен Десяткин саҥа саалаҕа сүргэлэрэ көтөҕүллэн айымньылаахтык үлэлии сылдьалларыттан киһи санаата көтөҕүллэр.
Петр ПАВЛОВ, “Саха сирэ” хаһыат, http: //edersaas.ru