Норуот үбүлээһинэ диэн ааттанар түөлбэлэр хомуйар харчылара аны сокуонунан бигэргэниллиэҕэ. Бу туһунан Гражданскай форум кэмигэр Ил Дархан Егор Борисов иһитиннэрдэ.
Аграфена КУЗЬМИНА, “Саха сирэ” хаһыат, edersaas.ru сайт.
“Биһиэхэ норуот үбүлээһинэ диэн урут-уруккуттан баар. Ылан көрүҥ, түөлбэлэр араас түгэҥҥэ хомуйар харчыларын, хампаанньалартан көмө көрдүүллэрин. Ити барыта фандрайзинг өйдөбүлүгэр киирсэр, ол эбэтэр баҕа өттүнэн ханнык эмит бырайыакка харчы төлөөһүнэ. Онон бу маны сокуонунан бигэргэтиэҕиҥ”, — диэн бэлиэтиир Егор Афанасьевич.
Ону сэргэ түөлбэлэргэ сыһыаран граннарга, куонкурустарга кытталларыгар туспа усулуобуйа тэрийиэххэ наадатын бэлиэтээтэ.
Оттон муниципальнай тэриллиилэргэ туһаайан, уопсастыбаннай түмсүүлэри дьиэ-уот өттүнэн өйүүргэ эттэ. “Төһө кыалларынан дьиэнэн-уотунан көмөлөһүҥ. Түмсүүлэр аренданы, уоту-күөһү төлүүллэр. Ити барыта кинилэргэ улахан ноҕорууска. Онон манна эмиэ чэпчэтиилэри көрүөҕүҥ”, — диэн бэлиэтиир Егор Афанасьевич.
Манна даҕатан эттэххэ, өрөспүүбүлүкэ РФ үбүн министиэристибэтин, Аан дойдутааҕы бааны кытары олохтоохтор көҕүлээһиннэрин өйөөһүҥҥэ бырагыраама олохтообута. “Бу сылга 5 улууска, Чурапчыга, Уус Алдаҥҥа, Хаҥаласка, Үөһээ Бүлүүгэ, Эдьигээҥҥэ, тарҕаттыбыт. Манна анаан 32 мөл. солк. көрдүбүт. Билигин 66 муниципальнай тэриллии сайаапка биэрэн олорор. Олохтоох салайыныыга норуот көҕүлээһинин өйүүргэ 1 мөл. солк. биэрдибит. Манна муниципальнай тэриллии 5 % үбүлээһини көрүөхтээх, оттон нэһилиэнньэ 3 % хомуйуохтаах. Эһиилги сылга бу сууманы 100 мөл. солк. диэри улаатыннарар былааннаахпыт. Маны норуот өйөөтөҕүнэ, ылыннаҕына өссө үрдэтиэхпит”, — диэн түмүккэ Ил Дархан бэлиэтиир.
Аграфена КУЗЬМИНА, “Саха сирэ” хаһыат, edersaas.ru сайт.