Бэс ыйын 20 күнүгэр Дьокуускай куоракка Гражданскай форум ыытыллыаҕа. Форуму тэрийээччилэр быйыл ордук түөлбэлэргэ болҕомто уурар санаалаахтар. Бу туһунан бүгүн Гражданскай уопсастыба институттарын сайдыытын миниистирэ Сардаана Гурьева суруналыыстарга иһитиннэрдэ.
Аграфена КУЗЬМИНА, “Саха сирэ” хаһыат, edersaas.ru сайт.
Сардаана Михайловна бэлиэтииринэн, форум коммерческайа суох уопсастыбаннай түмсүүлэри, өрөспүүбүлүкэ күннээҕи олоҕор көхтөөхтүк кыттар дьону-сэргэни, предпринимателлэри, судаарыстыбаннай уонна муниципальнай былаас бэрэстэбиитэллэрин барыларын биир суолга түмэр сыаллаах тэриллэр. Манна 600-тэн тахса киһи кэлэрэ былааннанар. Бу тэрээһини бырабыыталыстыба көҕүлээһининэн Уопсастыбаннай палаата, олохтоох салайыныы сэбиэтэ ыыталлар.
Форум кэмигэр барыта биэс тиэмэнэн былаһааккалар үлэлиэхтэрэ. Ол курдук, түөлбэлэргэ, табаарыстыбаларга туспа былаһаакка анаатылар. Быйыл Ыччат сылынан, оҕолорго, эдэр дьоҥҥо туһуламмыт тиэмэлэр ырытыыга тахсыахтара. Социальнай бииргэ үлэлээһиҥҥэ эмиэ туспа былаһаакка бэрилиннэ. Ону сэргэ, оҕуруотунан дьарыктанааччыларга, Уһун Илин регионнарга бэриллэр биир гектар сири интэриэһиргээччилэргэ анаан туспа кэпсэтии буолуоҕа. “Быйыл түөлбэлэргэ улахан болҕомтобутун уурдубут. Билигин өрөспүүбүлүкэ үрдүнэн 1500-тан тахса түөлбэ баар. Кинилэртэн уонтан тахса түөлбэ регистрацияланна”, — диэн этэр Сардаана Михайловна.
Анал былаһааккалары таһынан, семинардар, үөрэтэр куурустар, трениннэр ыытыллыахтара. Судаарыстыбаннаспыт 100 сылын көрсө тэриллибит “100 бастыҥ көҕүлээһин” куонкурус кыайыылаахтарын, үчүгэй үлэлээх уопсастыбаннай түмсүүлэр быыстапкалара туруоҕа. Ону сэргэ, баҕалаахтарга босхо юридическай көмө оҥоһуллуоҕа.
Аграфена КУЗЬМИНА, “Саха сирэ” хаһыат, edersaas.ru сайт.