Бүгүн, муус устар 1 күнүгэр — Дьокуускай куорат полициятын патруллуур-постовой сулууспатын батальона тэриллибит күнэ.
Бу сулууспа полицейскайдарын биһиги күн аайы көрөбүт, сатыы да, массыынанан да, атынан да, ыттаах да сылдьалларын — дэлэҕэ даҕаны, кинилэри норуот сулууспатынан ааттыахтара дуо!
Түүннэри-күнүстэри, көннөрү күн буоллун, бырааһынньык күннэрэ буоллун, томороон тымныы буоллун, өҥүрүк куйаас буоллун, буурҕа да түстүн, ардахтаах да буоллун — кинилэр уопсастыбаннай бэрээдэги көрөллөр, биһиги нус-хас олохпутун араҥаччылыыллар.
Буруйу оҥорууну утары охсуһууга бу мэлдьи инники күөҥҥэ сылдьар сулууспа полицейскайдара дьоҥҥо көмөҕө, быһылаан буолбут сиригэр бастакынан тиийэллэр, бэрээдэги, сокуону кэспиттэри ир суолларын ирдээн, тоҥ суолларын тордоон, буруйдары «сылааһына» арыйаллар.
Бэйэтэ туспа үгэстэрдээх сулууспа 20-с үйэ 70-с сылларыттан силис тардар. Оччолорго киин куорат милииссийэтигэр уопсастыбаннай бэрээдэги көрүүгэ уонна уулуссаҕа буруйу оҥорууну сэрэтиигэ суһал дивизион сулууспалаабыт.
Бу дивизион сотрудниктара дьуһуурунай чаас үлэтин хааччыйбыттар, кыбартыыралартан уорууга тиийэллэр, обургу оҕолор буруйу оҥорууларын сэрэтиинэн итиэннэ бэрээдэги көрүүнэн дьарыктаммыттар эбит.
Онтон 80-с сыллар саҥаларыгар САССР ИДьМ-тын уопсастыбаннай бэрээдэги харабыллааһыҥҥа салаатыгар ППС ротата диэн баар буолбут. Кини базатыгар 1992 сыл муус устар 1 күнүгэр ППС батальона тэриллибит.
Бүгүн ППС — эдэрдии эрчимнээх, күүстээх-уохтаах, туруоруллубут соруктары толору быһаарар кыахтаах модун сулууспа! Эҕэрдэ, уолаттар!
Биһиги корр., «Саха сирэ» хаһыат, edersaas.ru
Хаартыскалар: Дьокуускай куорат полициятын пресс-сулууспата