Арыгы иһэн мэйиитэ туймаарыйбыт, эбиитин бэйэтэ боруоктаах киһиэхэ туох барыта сылтах буолуон сөп.
Өлүөхүмэҕэ силиэстийэ уорганнара 38 саастаах киһиэхэ РФ Холуобунай кодексатын 111-с ыст. 4-с чааһынан, ол эбэтэр, киһи доруобуйатыгар ыарахан эмсэҕэлээһини соруйан оҥорон, сэрэҕэ суохтан өлүүгэ тиэрдии бэлиэтэ баарынан, холуобунай дьыала тэрийдилэр. Бу туһунан РФ СК Саха сиринээҕи управлениета иһитиннэрдэ
Силиэстийэ сабаҕалыырынан, ыам ыйын 31 күнүгэр, түүн Өлүөхүмэ куоракка «Волна» кафе-баарга икки эр киһи иирсибит. Доҕотторун кытта төрөөбүт күнүн бэлиэтии олорбут 26 саастаах киһиэхэ бу 38 саастаах итирик киһи тиийэн, төбөҕө күүскэ охсубут.
Эмсэҕэлээччи өйүгэр киирбэккэ, балыыһаҕа тиэллэн иһэн, аара суолга тыына быстыбыт.
Уорбаланааччы оҥорбут буруйун билиммит, кини быһаарбытынан, өлүөхсүт кыргыттарга убаастабыла суох сыһыана кинини охсорго төрүөт буолбут.
Уорбаланааччы хаайыллыбыт, силиэстийэ салҕанар.
Вера МАКАРОВА, «Саха сирэ» хаһыат, edersaas.ru
Хаартыска: интернеттэн.