Бүгүн Дьокуускай куорат тэриллибитэ 386 сылын бэлиэтиир. Бырааһынньыктааҕы тэрээһиннэр хас да күн инниттэн саҕаламмыттара. Сүрүн тэрээһиннэр балаҕан ыйын 8-9 күннэригэр буолаллар.
edersaas.ru
Ол курдук, бэҕэһээ төһө да тымныы, тыаллаах күн буоллар, элбэх тэрээһин көхтөөхтүк ыытылынна. Куорат олохтоохторун болҕомтолорун “Балык миинин бэстибээлэ”, “Барыанньа бырааһынньыга”, дьоппуон култууратын бэстибээлин курдук элбэх киһини түмэр тэрээһиннэр тардаллар. Холобур, “Балык миинин бэстибээлигэр” 13 хамаанда кытынна. Манна эрэстэрээннэр эрэ буолбакка, ким баҕарар кыттар кыахтаах. Интэриэһинэйэ диэн, бэстибээлгэ тиийэн, ким баҕарар ураты бүлүүдэни амсайар эрэ кыахтаах буолбатах, ырыссыабын эмиэ сурунан ылыан сөп. Былырыыҥҥы бэстибээлгэ “Махтал” эрэстэрээн бүлүүдэтэ кыайбыта.
Куорат күнүгэр сайын устата ыытыллыбыт куонкурустар түмүктэрин таһаараллар. Сыл аайы ыытыллар “Мөлүйүөн сибэкки” куонкурус кыайыылаахтарыгар харчынан бириэмийэни туттардылар.
Тэрилтэлэргэ Дьокуускайдааҕы наркологическай диспансер Кангаласс бөһүөлэгэр баар салаата кыайда. Оскуола иннинээҕи оҕо тэрилтэлэригэр “Колокольчик” оҕо саада, үөрэх тэрилтэлэригэр – өрөспүүбүлүкэтээҕи анал коррекционнай оскуола-интэринээт, чааһынай дьоҥҥо – Тамара Белан кыайдылар.
Хас да ыйы быһа ыытыллыбыт “Битва блогеров” күрэскэ суруналыыс Елена Аммосова уонна уопсастыбанньык Гаврил Чемоханов эрбии тииһин курдук эриһэн кэллилэр. Кыайыылаах кыбартыыраны ылыахтаах. Күрэс түмүгэ бүгүн тахсар.
Куорат күнүн көрсө саҥа тутуулар дьэндэһэн, оҕо былаһааккалара, ураты комплекстар тутуллан, Дьокуускайы киэргэтэллэр. “Московскай” атыы-эргиэн дьиэтин иннигэр “Дьокуускайы таптыыбын!” диэн арт-исталляция үлэҕэ киирдэ. Маны куонкуруска кыайан, архитектордар Мария Скрябина уонна Светлана Бугаева идиэйэлэрин олоххо киллэрэр кыахтаммыттар. Инсталляция киэһэ сырдатыллар, сүрэҕэ кыһыл уотунан умайар. Манна хаартыскаҕа эрэ түспэккэ, ыскамыайкатыгар олорон сынньаныахха сөп.
Владимировка таһыгар “Священный табун мифических лошадей” диэн ленд-арт аһылынна. Сүүстэн тахса аты худуоһунньук Николай Полисскай уонна волонтердар талахтан таҥан оҥорбуттар. Киэһэтин аттар уотунан умайаллар, ыраахтан олус уратытык көстөллөр. Куорат олохтоохторугар уонна ыалдьыттарыгар өссө биир сынньанар сир баар буолла.
Сынньалаҥ пааркатыгар, Эргэ куоракка, болуоссаттарга, уокуруктарга бырааһынньыктааҕы тэрээһиннэр, кэнсиэртэр, быыстапкалар, куонкурустар тиһигин быспакка ыытылла тураллар.
Ангелина Васильева, “Саха сирэ” хаһыат, edersaas.ru