Дьокуускай куорат 12-с нүөмэрдээх оскуолатыгар Ийэ тыл декадатын түмүктүүр икки улахан тэрээһин ыытылынна. Орто сүһүөххэ (5-8 кылаастарга) Аман өс, оттон улахан сүһүөхтэргэ (9-11 кылаас үөрэнээччилэригэр) Иван Гоголев хоһооннорун уус-уран ааҕыыга күөн күрэс буолла.
edersaas.ru
Аныгы ыччат кинигэни аахпат, сахалыы саҥарбат буолла диэн үгүстүк этэллэр. Аҕыйах сылтан бэттэх куорат нууччалыы тыллаах оскуолатыгар саха кылаастарын аһан, сахалыы тыыны киллэрбиттэрэ. СӨ Үөрэҕириитин туйгуна, “Саха — Азия оҕолоро” фонда стипендиата, үгүс уопуттаах саха тылын, литэрэтиирэтин учуутала Клара Ксенофонтова төрөөбүт тыл туһугар уруккуттан туруулаһар. Тустаах оскуолаҕа кэлин биир өйдөөх-санаалаах дьон мустан, сэргэхситиини таһаардылар. Тиһигин быспакка араас тэрээһиннэри ыыталлар. Аман өс күрэс олортон биирдэстэрэ буолар. Тэрээһини Клара Ксенофонтова бэйэтэ иилээн-саҕалаан ыытта.
Балаһыанньа быһыытынан, кылаас аайыттан биир уол, биир кыыс уонна төрөппүт кытыннылар. Аман өс тиэмэлэрэ: “Ааҕыы тоҕо нааданый?”, “Үчүгэй кинигэ — үтүө сүбэһит”, “Мин сөбүлээн аахпыт кинигэм”.
Бу тэрээһиҥҥэ бастакы миэстэҕэ 8 “Б”, иккискэ 7 “Б”, үһүскэ 6 “Б” кылаас үөрэнээччилэрэ таҕыстылар. Оттон биһирэбил бирииһи 5 “Б” кылаас ылла. Иккис күөн күрэскэ 11 “Б” кылаас бастакы, 9 “Б” кылаас иккис, 10 “Б” кылаас үһүс миэстэлэннилэр.
Бу, оҕону төрөөбүт тылга, тапталга иитэр икки тэрээһин дьүүллүүр сүбэтинэн уонна спонсордарынан “Бичик” кинигэ кыһата, “Кэскил” хаһыат буоллулар. Сахалыы таҥастаах, ийэ тылларын кэрэхсиир оҕолор ортолоругар, көрөөччүлэр, иҥнигэһэ суох санаатын сайа этэр Саша Боескоровы (8 “Б” кылаас), оттон улахан сүһүөххэ 11 “Б” кылаас төрөппүтэ Римма Крылова уонна бу кылаас үөрэнээччитэ Дуолан Лугинов хоһоону олус иэйиилээхтик аахпыттарын бэлиэтээтилэр.
Төрөппүттэр кэнники кэмҥэ оҕо аахпат буолбутун ыйан туран, кинилэри хайдах аахтарыахха сөбүн туһунан санааларын, бэйэлэрин да өттүлэриттэн көмөлөһөргө бэлэмнэрин эттилэр.
Бэйэбит корр, edersaas.ru