Соторутааҕыта биир ааҕааччыбыт Арассыыйа иккис ханаалыгар Андрей Малахов «Девочка-леопард» биэриитигэр дьон кыһалҕатын көргө-күлүүгэ кубулуппутуттан хомойбутун туһунан суруйбут суругар үгүс ааҕааччы санаатын эттэ.
edersaas.ru
Сурук ааптара оҕо төрүүр балыыһаларыгар психологтар бааллара буоллар, ийэлэр оҕолорун быраҕан бараллара уонна уйулҕалара кэһиллэрэ аҕыйыа этэ диэн санаатын үллэстибитэ.
Кырдьыга да, оччотооҕу да кэмҥэ буоллун, «леопард-кыысчаан» ийэтин аттыгар үрүҥ халааттаах аанньаллары сэргэ, психолог, сүбэлиир-амалыыр чугас дьоно бааллара эбитэ буоллар… дии саныыгын. Хомойуох иһин, билигин даҕаны, аныгы сайдыылаах кэммитигэр балыыһаларга психологтар штаттара улаханнык көрүллүбэт. Буоларын курдук, мэлдьи үп-харчы суоҕар сигэнэбит.
Эдэр ийэлэр тоҕус ыйы быһа сүрэхтэрин анныгар илдьэ сылдьан баран, олох араас ыарахаттарыттан куттанан эбэтэр ыарыһах оҕо төрөөн, быстах санаа ухханыгар киирэн хаалаллара хомолтолоох.
Үгүс ааҕааччы санаатыттан билиһиннэрдэххэ, маннык хартыына тахсан кэллэ
«Өссө айылҕаҥ биэрбит аналынан хайдах эрэ төрүөҥ, оттон оҕону иитии атын туругу, билиини-көрүүнү, сатабылы, тапталы эрэйэр. Онуоха психолог көмөтө мэһэйдиэ суох этэ».
«Төрүүр дьиэҕэ психолог олус наада. Тоҕо диэтэххэ, оҕо күүтэ сылдьан, оҕобун төрөттүм да барыта түмүктэнэрин, инникитин чэпчэки олох күүтэрин эрэ курдук саныыгын. Дьиҥэр, төттөрүтэ буолар эбитин кэлин өйдүүгүн».
«Психолог оннугар киһи уйулҕатын үөрэтэр кууруска үөрэммит акушеркалар бааллара буоллар. Тоҕо диэтэххэ, кинилэр киһи физиологиятын, дьахталлар төрүүр кэмҥэ туруктарын билэллэр, өссө массаас да оҥуоруохтарын сөп».
«Тугун эмиэ психологай? Барыта этэҥҥэ буоллаҕына, балыыһаттан тахсан барар буоллаҕым, дьиэбэр миигин дьонум күүтэллэр. Онто да суох балыыһаҕа сытан араас кыһалҕалаах ийэлэри кытары кэпсэтэҕин, хаайыыга курдук хааллан сытаҕын. Онно эбии өссө ол психологтар ону-маны ыйыталаһаллара, «сордууллара» наадата суох ини…»
Ити курдук, эдэр ийэлэр санаалара араас. Чинчийиилэр көрдөрөллөрүнэн, төрүүр кэмҥэ психолог көмөтүн билбит ийэлэр ыарыыны уҕарытар эми мээнэ көрдөөбөттөр, кылбардык төрүүллэр уонна оҕолонон баран улахан ыарахаттары көрсүбэттэр.
Надежда ЕГОРОВА, «Саха сирэ» хаһыат, edersaas.ru