Төрүт үгэстэри өрө тутан

Ааптар: 
Бөлөххө киир:

Саха төрүт оонньууларыгар спартакиада норуот култууратын, үгэстэрин чөлүнэн хаалларыыга көмөлөһөр, биир уопсай сорук тула түмэр. Бу туһунан өрөспүүбүлүкэ Ил Дархана Егор Борисов от ыйын 13 күнүгэр буолбут сүүрбэһис «Манчаары Оонньууларын» түмүгүн таһаарар үөрүүлээх мунньахха эттэ.

edersaas.ru


Сорох аҕыйах ахсааннаах норуоттар, хомойуох иһин, төрүт култуураларын, үгэстэрин умнан олороллор, оттон биһиги өбүгэлэрбит үгэстэрин тутуһабыт, кимтэн кииннээхпитин, хантан хааннаахпытын билэбит диэн туран, Егор Афанасьевич маныаха спорт национальнай көрүҥнэрэ эмиэ көмөлөһөллөрүн ыйда. Итиэннэ үөһээ-бүлүүлэргэ спорт бырааһынньыгын тэрийиигэ көхтөөхтүк үлэлээбиттэрин иһин махтанна.

СӨ бырабыыталыстыбатын бэрэссэдээтэлин солбуйааччы, Оонньуулары тэрийэр кэмитиэт салайааччыта Михаил Гуляев Үөһээ Бүлүүгэ ыытыллыбыт үбүлүөйдээх тэрээһин «Манчаары оонньууларын» устуоруйатыгар биир саамай чаҕылхай күрэхтэһии быһыытынан киирдэ диэтэ.

Оонньуулар ыытыллалларынан, Үөһээ Бүлүүгэ аныгы ирдэбилгэ толору эппиэттиир үс тыһыынча киһи киирэр стадиона, спорт киинэ, биир бастыҥ оҥоһуулаах ипподром, Култуура дьиэтэ, Хомустаах сэлиэнньэтигэр универсальнай былаһаакка тутуллан туһаҕа киллэрилиннилэр. Маны сэргэ оскуолалар өрөмүөннэннилэр, улуус киинигэр уопсайа отут биэс биэрэстэ усталаах уулуссалар аспаалынан бүрүлүннүлэр.

Михаил Дмитриевич сүүрбэһис «Манчаары оонньууларыгар» бэлэмнэнии дьиҥ-чахчы норуот хамсааһынынан буолбутун, манна олохтоохтор эдэриттэн эмэнигэр тиийэ кыттыбыттарын бэлиэтээтэ.

Оонньууларга 38 хамаандаттан 1,5 тыһыынча спортсмен саха төрүт оонньуутун 13 көрүҥэр илин былдьаста. Түөрт күннээх күрэхтэһии кэмигэр өрөспүүбүлүкэ тоҕус рекорда олохтонно. Оонньуулар дьоруойдарынан биллиилээх быһый Сардаана Трофимованы, хапсаҕайга уонна мас тардыһыытыгар бастаабыт Иван Белолюбскайы, аҕыс төгүл кыайыылааҕынан тахсыбыт Диана Адаськоны, саха оҕунан ытыыга Оонньуулар саамай эдэр чөмпүйүөннэрин Женя Титованы ааттаталыахха сөп.

Михаил Дмитриевич бырайыагынан салайыы киллэриллибитэ Оонньуулары үрдүк тэрээһиннээхтик ыытары хааччыйбытын тоһоҕолоон бэлиэтээтэ.

Роман ПОПОВ, «Саха сирэ» хаһыат, edersaas.ru

Андрей Сорокин (СИА) хаартыскаҕа түһэриилэрэ.

+1
0
+1
0
+1
0
+1
0
+1
0
+1
0
+1
0