Дьокуускайга «Сладкий кусочек добра» үтүө санаа дьаарбаҥката төрдүс төгүлүн ыытыллар.
Быйылгы дьаарбаҥка Арассыыйаҕа Үтүө санааланыы сылын чэрчитинэн, Дьокуускай куорат уокуруктаа5ы дьаһалтатын, «Молодежный комитет «Опора России» Саха сиринээҕи отделениетын өйөбүллэринэн ыытылларын туһунан Дьокуускай куорат маассабай иһитиннэрэр-биллэрэр сириэстибэлэри кытары үлэҕэ Департамена иһитиннэрдэ.
Дьаарбаҥка ыарахан балаһыанньаҕа түбэспит дьиэ кэргэттэри өйүүр сыаллаах-соруктаах тэриллэр. Манна кондитерскай аһы-үөлү сэргэ, илиинэн оҥоһуктар, инста-маҕаһыыннар табаардара атыыланыахтара.
Санатан эттэххэ, бырайыак 2017 сыл сайыныттан үлэтин ситиһиилээхтик саҕалаабыта. Бу иннинэ ыытыллыбыт үс дьаарбаҥкаҕа 50 тыһыынчаттан тахса харчы киирбитэ уонна Дьокуускай саамай үтүө санаалаах киһитигэр Антон Васильевка туттарыллыбыта.
Быйылгы тэрээһин «Сахаэкспоцентр» АБК ыытыллыа. Үөрүүлээх тэрээһиҥҥэ кэлбиттэри Тедди бэһиэлэй эһэчээн көрсүөҕэ. Күнүс бэртээхэй кэнсиэр буолуоҕа.
Ыалдьыттары сэтинньи 10 күнүгэр күнүс 11 чаастан киэһэ алтаҕа диэри Дьокуускай киинигэр турар «Сахаэкспоцентр» бэһис мэндиэмэнигэр күүтэллэр.
Хаартыска: интэриниэттэн