Чернышевскай уулуссатын 98 №-гэр турар кууһунан атыылыыр бааза баар. Манна тиэргэҥҥэ киирээти кытта, “Чэпчэки” эҥин диэн сахалыы суруктаах “20 №-дээх” маҕаһыын баар. “Үтүө санаа” долбуурдаах маҕаһыыҥҥа киирэн кэллим. Хараҕым долбуурга хатана түстэ. Хара сарсыардаттан долбуурдара туолбутун көрөн соһуйдум. Эргиэн эйгэтигэр эдэр эрдэҕиттэн үлэлээбит уопуттаах атыыһыт Марина Докащенколыын бэрт кылгастык кэпсэттибит.
Женни Стрюкова, “Саха сирэ” хаһыат, https://edersaas.ru
— Хайыы, бу бэҕэһээ батсаабы аймаабыт долбуурбут дуу?
— Дьэ, бу турар.
— Долбуургут толору дии. Хайа икки ардыгар бородууктанан толордугут?
— Ээ, бэҕэһээ үлэ чааһын бүтүүтэ миигин массыынанан ыла кэлэ сылдьан кыыһым, чааһынай тэрилтэҕэ буҕаалтырынан үлэлиир Светлана Давыдова маннык долбуурдаахпытын көрөн, 972 солк. бородуукта атыылаһан уурбута.
— Үчүгэй кыыстаах эбиккин! Бээрэ, “Үтүө санаа” долбуурун дьон хайдах ылынна?
— Бэҕэһээ долбууру үлэлэппиппит бастакы күнүгэр манна “көр бөҕө”. Ким улахан суумкалаах, ким нуорка саҥыйахтаах барыта баара. Биэнсийэлээхтэр батсаабынан тарҕаммыт сонуну сыыһа өйдөөн, маҕаһыын иһигэр атыыланар барыта босхо дии санаабыттар. Сорохтор биэнсийэлээх буолууларын туоһулуур дастабырыанньаны көрдөрөллөр. Хастыы да буолан, кыттыһан кэлбиттэр эмиэ бааллара. Ону дьоҥҥо өйдөтө сатаатыбыт. Бу атыылаһааччы бэйэтин баҕатынан, үтүө санаатынан атыылаһан, кыаммат, маннык көмөҕө наадыйар дьоҥҥо анаан уурарын туһунан санаттыбыт. Сымыйа акция диэн кыыһырааччылар, “Үтүө санаа” долбууругар ууруллубуту барытын суумкаларыгар хааланаары гыммыттар эмиэ бааллара.
— Ол гынан долбуургутун куруук үлэлэтиэххит дуу?
— Ким билэр. Долбуур сыалын дьон таба өйдөөтөҕүнэ. Көстөн иһиэҕэ. Дьиҥнээхтик маннык көмөҕө наадыйар киһиэхэ көмөлөстөрбүт бэрт буолуо этэ. Киһи аһыныгас буолуохтаах. Бэҕэһээ, холобура, биир биэнсийэлээх арыы атыылаһан итиннэ уурбута. “Бүгүн, баҕар, кимиэхэ эмэ наада буолуоҕа, сарсын бэйэбэр маннык көмө тириэҕэ”, — диэбитэ кини. Уонна маҕаһыыммыт хаһаайына, предприниматель Ольга Альбертовна Николаева күн аайы килиэбинэн көмөлөһөр баҕалаах.
Оптуобуска айаннаан иһэн көрдөххө, дьон үксэ чугастааҕы баазаларга түһэн хаалар. 98 №-хэ дьон олус элбэх тиийбэт дуу дии санаатым. Ыт элбэҕэ манна эбит.
Быйыл Дьокуускай мэрэ Айсен Николаев биллэрбит “Үтүө санаа сылын” предприниматель Ольга Николаева иилэ хабан ылбыта, туһугар эмиэ бэртээхэй хамсааһын. Холобур, “Токко” маҕаһыыҥҥа “Чэпчэтиилээх долбуур” баара эмиэ нэһилиэнньэ кыаммат араҥатыгар олус өйөбүллээҕэ чахчы. Маннык чэпчэтиилээх долбуурдар “Холбос” респотребсойуус маҕаһыыннарыгар өссө уонча сыллааҕыта баар буолбуттара. Оччолорго дьадайыыны утары аналлаах дэнэллэрэ. Оннук үлэлииргэ РФ Центросойууһа сүбэлиирэ.
Дьоҥҥо көмөлөһөр аналлаах маннык долбуурдар элбииллэрэ буоллар.
ЯТВ сюжета.
Женни Стрюкова, “Саха сирэ” хаһыат, https://edersaas.ru