Валентина Васильева салайааччылаах өрөспүүбүлүкэтээҕи «Эйгэ» уопсастыбаннай тэрилтэ Дьокуускайдааҕы 2 N-дээх Инбэлиит уонна төрөппүттэрин көрүүтэ-истиитэ суох хаалбыт оҕолор коррекционнай интэринээт-оскуолаларын кытта сибээстэспитэ үһүс сыла буолла.
Оттон куораттааҕы Светлана Винокурова салайааччылаах тэрилтэ «Алгыс» инбэлиит уонна кырдьаҕас дьон пансионатын кытта сибээс олохтообута төрдүс сыла.
“Эйгэ” ыытар «Үтүө санаа кустуга» акциятын өрөспүүбүлүкэ араас муннуктарыгар баар түмсүүлэр өйөөммүт, дьоҥҥо элбэх өрүттээх көмөлөрү оҥоробут. Ол курдук, холобур, соторутааҕыта биһиги — Мэҥэ-Хаҥалас улууһун Балыктааҕын «Доруобуйа» түмсүүтүттэн Марфа Ноговицына, Надежда Рожина, Августа Черкашина састааптаах дэлэгээссийэ Дьокуускай 2-с нүөмэрдээх Коррекционнай оскуолатыгар ыалдьыттаатыбыт. Үөрэнээччилэргэ доруобуйаны чэбдигирдэр эрчиллиилэри, тыыныы гимнастикатын, тас эйгэттэн эрчими иҥэринии дьарыгын үөрэттибит.
Оҕолору сахалыы туомунан эйгэлэрин ыраастаан, санааларын чэпчэттибит, сүбэ-ама биэрдибит, сахалыы сырылаччы сыллаан, имэрийэн-томоруйан, сүрэхпит сылааһыттан бэрсэн, оҕолорбутунуун тэҥҥэ астынныбыт.
Түмсүүбүт ийэлэрэ астаабыт минньигэс аспытын, кинигэлэрбитин бэлэх ууннубут. Оҕолор барахсаттар олус үөрэн-көтөн, махтанан атаардылар. Биһиги өссө да сибээстэһиэх буолан, дуоһуйан араҕыстыбыт. Айаммыт суолугар, оҕолор барахсаттар дьылҕалара санаа хоту салаллан, киһи-хара буола улааттыннар диэн Үрдүк Айыылартан көрдөһө истибит…
Марфа Ноговицына,
«Эйгэ» түмсүү чилиэнэ, «Доруобуйа» түмсүү салайааччыта.