Субсидияламмыт билиэккэ саастарынан хапсыбатах дьон толору тарыыбынан билиэт атыылаһаллар. Ол гынан баран, билиэти айанныаҥ икки-үс ый инниттэн ыллаххына, чэпчэки сыаналааҕы булуоҥ. Интэриниэт нөҥүө атыылаһарга араас промо-аахсыйа, чэпчэтии оҥоһуллар. Аны таһаҕаһа суох көтөр дьон улаханнык барыһырар буоллулар. Холобур, муус устар ыйга Москубаҕа диэри барарга 10 киилэ таһаҕастаах, оттон төннөргө таһаҕаһа суох буоллаххына, бара-кэлэ билиэти чэпчэкитик булуоххун сөп.
Көтүөҥ аҕыйах нэдиэлэ, хонук иннинэ, ордук сайыҥҥы уоппуска кэмигэр сыана үүнэ-тэһиинэ суох үрдүүр. Сүрүн барыстарын авиахампаанньалар бу кэмҥэ оҥороллор. Аны, маркетинг сокуонунан анараа барарга билиэт чэпчэки, төннөрүҥ саҕана икки бүк үрдүүр. Сынньана барбыт дьон хайыахтарай, сыана төһө да буоллун, син биир ылалларыгар тиийэллэр. Сорох тэрилтэлэр үлэһиттэрин айанын төлүүллэр эрээри, үксүн уоппускаҥ бүппүтүн, Саҥа дьыл чугаһаабытын, эбэтэр олох да ааспытын кэннэ биирдэ харчыны хойутаан түһэрэллэр.
Онон, бу сайын ханна бараргын эрдэттэн былааннаан, сыана үрдүөн иннинэ, муус устар ыйы баттаһа билиэт ылбыт ордук. Аны, чэпчэтиллибит билиэти төннүннэрэр уустуктардаах. Күнүн уларытарга хас да тыһыынчаны эбии төлүөххүн эмиэ наада буолар.
Марианна ТЫРТЫКОВА, «Саха сирэ», edersaas.ru
Хаартыскалар: интэриниэттэн