«Сахаэнерго» хампаанньа быйыл аан бастакытын таас чоҕу Хотугу муора суолунан тириэртэ. Хампаанньа пресс-сулууспатын салайааччыта Виктория Варламова иһитиннэрбитинэн, Усуйаана улууһун Депутатскай бөһүөлэгин ТЭЦ-гар 22 тыһ. тонна таас чох тиэрдиллибит.
Бу иннинэ оттугу Уус Куттан Уус Куйгаҕа диэри уу тырааныспарынан хас да сиргэ сүөкээн-саамылаан, үгүс ороскуотуран туран таһаллара. Эбиитин кэлиҥҥи сылларга Өлүөнэ өрүс үөһээ тардыытыгар уу таһыма намтаан, энергетиктэр үлэлэрин атахтыыр буолла. Инньэ гынан. “Сахаэнерго” исписэлиистэрэ саҥа хайысханы тобулан, муора суолун туһаннылар.
Быйылгы навигацияҕа таас чоҕу Мурманскайдааҕы муора пуордугар мунньан баран Нижнеянскайга диэри тиэйдилэр. Онон тиэллиэхтээх оттук барыта кэмигэр таһылынна.
Анивера Акимова, «Саха сирэ» хаһыат, https://edersaas.ru/