Быйылгы халаан уутуттан хас да улуус олохтоохторо эмсэҕэлээтилэр. Ол курдук ыам ыйын 14-15 күннэринээҕи туругунан Тааттаҕа ууга барбыт нэһилиэктэр баһылыктарын кытта төлөпүөнүнэн кэпсэтиигэ бу курдук эттилэр.
edersaas.ru
Чымнаайы баһылыга Егор Васильев: «Биһиги нэһилиэкпит үстэ улахан ууга барбыта, онон бэлэмнэнии үлэтин эрдэттэн ыыппыппыт. Ынаҕы-сүөһүнү үрдүк сиргэ көһөрбүппүт, оскуолаҕа, кулуупка быстах кэмҥэ олорор пуун тэрийэн, онно билигин 69 киһи баар. Ас-үөл, иһэр уу, эмп-томп, ГСМ өттүнэн хааччынан олоробут.
Уу таһыма 1223 см. куоһаран, 1280 см. тиийэн, 190 тиэргэнтэн 130-та ууга турар, 20-чэ ыал дьиэтигэр уу киирдэ. Өрүс биэрэгэ сиҥнэн түстэ. Нэһилиэк иһинээҕи уулусса, Харбалаах—Чымнаайы суола хас да сиринэн алдьанна, мотуорунан сылдьабыт, онтон массыынаҕа олорон айанныыбыт. Бастатан туран, суолбутун чөлүгэр түһэрэргэ үлэ күүскэ барыан наада», — диэн эттэ.
Харбалаах баһылыгын солбуйааччы Борис Дайбанныров: «16 социальнай эбийиэк, 53 чааһынай дьиэ тэлгэһэтэ ууга барда, 6 дьиэҕэ муостатыгар уу киирдэ. Билиҥҥитэ Амма өрүс уста сытар, муус убаҕас. Олохтоох нэһилиэнньэ саамай туруорсара диэн суол-иис бөҕөргөөн, үрэхтэри туоратар муоста оҥоһуллуон, ону таһынан, ыксаллаах кэмҥэ суотабай сибээс хааччаҕа суох быстыбакка үлэлиэн наада», — диэн балаһыанньаны билиһиннэрдэ.
Даайа Амматын баһылыга Петр Петров: «Ыам ыйын 14 күнүнээҕи туругунан 20 уһаайба, 17 дьиэ ууга барда. 13 дьиэҕэ уу муоста үрдүнэн киирдэ. Барыта 70 киһи эмсэҕэлээтэ, ол иһигэр 19 оҕо, кырдьаҕастар, инбэлииттэр бааллар. Дьоммутун эвакуационнай пууҥҥа көһөртөөтүбүт, ый бүтүөр диэри иһэр уубут, аспыт-үөлбүт саппааһа баар. Халаан уута суолу быста, өссө ардах түһэн, эбии алдьатан, сырыы суох. Бааһыналарбытыгар, хонууларбытыгар муус халҕаһата тоҕо анньан киирдэ. Онон, тыа хаһаайыстыбатыгар хоромньу улахан», — диэн билиһиннэрдэ.
Халаан уутуттан эмсэҕэлээбиттэргэ регионнааҕы, эбэтэр федеральнай таһымнаах ыксаллаах быһыы-майгы үөскээбититтэн көрөн, өрөспүүбүлүкэтээҕи уонна федеральнай резервнэй фондаттан хас биирдии киһиэхэ тустаах көмө оҥоруохтара. Ол харчытын ыларга биир ыйы уһаппакка нэһилиэк баһылыгын аатыгар сайабылыанньа суруйуохха наада.
Марианна ТЫРТЫКОВА, «Саха сирэ», edersaas.ru