close
Тааттаҕа Айсен Николаев халааҥҥа эмсэҕэлээбиттэри көрүстэ...
Олох-дьаһах

Тааттаҕа Айсен Николаев халааҥҥа эмсэҕэлээбиттэри көрүстэ

Ил Дархан э.т. Айсен Николаев Тааттаҕа үбүлүөйдээх ыһыахха сылдьан баран, Харбалаах уонна Чымнаайы нэһилиэктэригэр халааҥҥа эмсэҕэлээбит  дьону кытта көрүстэ.

edersaas.ru

Бастакы тохтобул Харбалаах нэһилиэгэр буолла. Айсен Николаев Харбалаахтааҕы «Төлөн» ААУо чох карьерын салайааччыта Прокопий Рахлеевы кытта көрсөн, бырамыысыланнас тэрилтэтэ сайдар хайысхаларын ырытыста.

Салайааччы тэрилтэ күннээҕи уонна кэлэр кэскиллээх былааннарын билиһиннэрдэ.

Онтон Айсен Николаев Харбалаахха тиийэн, Егасовтар дьиэ кэргэттэрин кыһалҕаларын кытта билистэ.

Уу эмискэ түргэн баҕайытык кэлбитэ уонна түөрт күн туран, хайа да дьыллааҕар бытааннык түстэ. Нэһилиэкпит ортотун хомойдубут. Кытыытыгар чааһынай дьон дьыалабыай мастара устан кэлбитэ сытар. Мастарын хомуналларыгар биллэрии таһаарбыппыт. Бу нэдиэлэ саҥатыттан хомунуохтара, — диэн нэһилиэк баһылыга Альберт Кулачиков кэпсии тоһуйда.

Егасовтар дьиэ кэргэннэрин  аҕа баһылыга салайааччыларга дьиэлэрин уу ылбытын көрдөрдө, кыһалҕатын кэпсээтэ.

Оһохпут сууллан түһэн эрэр. Ыксаан тимиринэн таттаран олоробут, — диэн кэпсиир Изот Егорович.

Бу ыал дьиэтэ намыһах сиргэ турар буолан, халааҥҥа бастакынан эмсэҕэлиир эбит. Дьиэ анныгар төһөлөөх уу сытыйан сытарын ким билиэй? Ол номнуо биллэр. Дьиэ иһэ сиик, түүнүк сыттанан эрэр.

Егасовтар дьиэлэрэ киһи олорбот туруктаммыт. Онон бу ыал маны бигэргэтэр тустаах докумуону хомуйа сылдьаллар.

Салгыы Харбалаах «Теплица» ТОС кыһалҕатын уопсастыбанньык Диана Соломонова кэпсээтэ. Олохтоохтор нэһилиэк электролиниятыгар холбонорго көрдөһө сатыыллар да, боппуруос оннуттан хамсаабат эбит.

— Бүгүҥҥү күҥҥэ диисэлинэн олоробут. Нэһилиэктэн  200 м сиргэ олорон, уоппут суох, — диэн Ил Дархан э. т. Айсен Николаевка кыһалҕатын быһаарда Диана Соломонова.

— 2016 сылтан былааҥҥа турар Чычымах линията уларыйахтаах эрээри, сыл аайы көһөн-көһөн олох да оҥоһуллар кыаҕа суох буолбут. «Якутскэнерго» тэрилтэ салалтата бу үлэни оҥорорго тиэхиньиичэскэй өттүнэн уустуктардааҕын бэлиэтээбитэ, — диэн быһаарар баһылык. Ол эрээри Диана Соломонова:

Ааспыт сырыыга бу тэрилтэ исписэлииһэ кэлэн: «Эһиэхэ «переключатель» турар кыахтаах, холбуохпут. Чычымах уотун араардыбыт да, холбуохпут», — диэбитэ. Ол эрээри күн бүгүҥҥэ диэри туох да оҥоһулла илик. Остуолбалар сууллаары нэһиилэ тураллар. Бу боппуруос быһаарыллыыта отучча сылы быһа тоҕо кыаллыбатын өйүм хоппот, — диэн санаатын тиэртэ.

Ил Дархан э.т. Айсен Николаев харбалаахтар балаһыанньаларын кытта ыкса билсэн баран:

Кыһалҕаҕытын өйдөөтүбүт. Үлэлэһиэхпит, өйүөхпүт, — диэн дьон санаатын көтөхтө.

Елена ПОТОЦКАЯ, «Саха сирэ» хаһыат, edersaas.ru 

Хаартыскаҕа ааптар түһэриитэ. 

 

 

 

#бүгүн: 1
2
0

Сайт матырыйаалларын ааптар көҥүлэ суох ылар бобуллар.