Бүгүн сайтпытыгар «Мэҥэ Хаҥаласка суол быһылааныгар биэс киһи өллө, үс киһи эмсэҕэлээтэ» диэн иһитиннэриибит бэчээттэммитэ.
Бастакы иһитиннэриинэн, бэҕэһээ, ахсынньы 8 күнүгэр, Мэҥэ Хаҥалас улууһугар тахсыбыт суол улахан быһылааныгар биэс киһи өлбүт, үс киһи эмсэҕэлээбит диэн этэ.
РФ Ыксаллаах быһыыга-майгыга министиэристибэтин Саха сиринээҕи управлениетын бүгүн 13.00 чаастааҕы иһитиннэриитинэн, биэс буолбакка, тоҕус киһи өлбүт, үс киһи араас эчэйиини ылбыт.
РФ Силиэстийэлиир кэмитиэтин Саха сиринээҕи управлениета иһитиннэрбитинэн, бу чахчынан өссө иккис холуобунай дьыала тэрилиннэ. РФ Холуобунай кодексатын 238-с ыстатыйатын 3-с чааһынан. Ол эбэтэр, дьон олоҕор уонна доруобуйатыгар куттал суох буолуутун хааччыйыы ирдэбиллэригэр эппиэттээбэт өҥөнү оҥорон, иккиттэн элбэх киһини сэрэҕэ суохтан өлүүгэ тиэрдии бэлиэтэ баарынан.
Дьыаланы силиэстийэлээһин өрөспүүбүлүкэ борокуратууратын хонтуруолугар сылдьар.
Өлбүттээхтэргэ, кинилэр чугас дьонноругар кутурҕанын Ил Дархан Егор Борисов, Таатта улууһун дьаһалтата биллэрдилэр. Суол быһылааныгар суорума суолламмыттар чугас дьонноругар көмө оҥоһуллуоҕун туһунан иһитиннэрдилэр.
Таатта улууһугар үс күннээх траур биллэрилиннэ.
Биһиги корр., «Саха сирэ» хаһыат, edersaas.ru
Хаартыска: Якутск.ru