Маннык олохсуйбут үтүө үгэс бу улуус бары кэриэтэ тэрилтэлэригэр баар. Онон сыллата бу кэмҥэ ордук кырдьаҕастар, оҕолоох ийэлэр биир өртүнэн долгуйа кэтэһиилэрэ, иккис өртүнэн үөрүүлэрэ уонна махталлара үксүүр.
Улуустааҕы култуура управлениетын кэлэктиибин эр дьоно, ох курдук оҥостон, муус ылыытыгар таҕыстылар. Бу да сырыыга, бастакынан култуура эйгэтигэр өр кэмҥэ бэриниилээхтик уонна тахсыылаахтык үлэлээбит кырдьаҕастарыгар соһуччу бэлэх оҥордулар уонна тэрилтэлэрин быйыл иһэр мууһун хааччыйдылар.
— Бастакынан, култуура эйгэтигэр үлэлээбит бэтэрээннэрбитигэр Е.А.Хатылыковаҕа, Н.С.Осиповаҕа ылбыт мууспутун тиэргэннэригэр тиэйэн илдьэн биэрдибит. Бу биһиги кинилэргэ соһуччу бэлэхпитинэн буолла. Онон икки өртүттэн үөрүү-көтүү бөҕөбүт. Иккиһинэн, тэрилтэбитин мууһунан хааччыйдыбыт. Субуотунньукка элбэх киһи саба түһэн үлэбит көхтөөх, тахсыылаах буолла. Күн иһигэр 10-тан тахса бырысыабы тиэйдибит, — диэн кэпсээтэ култуура управлениетын салайар Гаврил Вырдылин.
Бэтэрээннэр быйылы быһа иһэр ууларын боппуруоһа быһаарыллан, үөрүүлэрэ муҥура суох. Сыллата эдэр дьон кинилэргэ маннык соһуччу үөрүүнү бэлэхтииллэрэ дэлэлээх үчүгэй буолуо дуо?
Сардаана БАСНАЕВА, “Саха сирэ” хаһыат, edersaas.ru