close
«Таатта» баантан сылтаан дьон хамнаһа суох хаалла...
· - Олох-дьаһах - Экэниэмикэ

«Таатта» баантан сылтаан дьон хамнаһа суох хаалла

Биллэрин курдук, үгүс урбаанньыттар «Таатта» бааҥҥа тэрилтэлэрин үбүн-харчытын, дьоннорун хамнаһын, куортамнарын төлөбүрүн, үлэҕэ туттуллар тэрили, саҥа оборудованиены, тиэхэньикэни атыылаһар үптэрин барытын харайар этилэр. Баан лицензията былдьаммытын кэнниттэн, кинилэр мөлүйүөнүнэн үптэрин ытыс соттон хааллылар.

edersaas.ru

Саамай абатыйаллара диэн, кинилэр харчылара нэһилиэнньэ уурдарыытын страховкалыыр ситимҥэ хапсыбат. Ол аата судаарыстыба урбаанньыттар сүтэрбит харчыларын төннөрөр эбээһинэһэ суох курдук буолан тахсар. Мантан сылтаан сүрэх ыарыыта буолан, биир түүн иһигэр дьон баттаҕа маҥхайа сыста.

Аны баан килийиэннэрэ, урбаанньыттар саамай долгуйаллара, «Таатта» бааны моҥкуруут ыыттахтарына, кинилэр харчылара төннүбэт. Онон, бары кыаҕы туһанан, моҥкурууттааһыны таһаарбат наадалааҕын, дьоҥҥо бу саамай тыын боппуруос буоларын этэллэр.

«Урбаан үлэһиттэригэр бу улахан охсуу буолла. Дьонум хамнаһын, маҕаһыын, автомойка, тэрилтэ хонтуоратын куортамын, кирэдьииппитин, ким эрэ ипотекатын бу ыйга төлүөхпүтүн харчы суох. Өссө от ыйын 3 күнүгэр нолуогабайга, пенсионнайга ыыппыт харчыбыт тустаах сиригэр тиийбэкк, ханна эрэ ыйанан хаалбыт. Өрөспүүбүлүкэ салалтата көмө оҥоруохпут диир даҕаны, ким да харчытын билиҥҥитэ төттөрү ыла илик. Баан быстах кэмҥэ үлэлиир дьаһалтата сайабылыанньа суруттарбыта уонна эппиэтин 30 күн күүтүҥ диэбитэ. Ким даҕаны бааҥҥа укпут харчыбыт төннөрүн туһунан эппэт. Сорох дьон ыксаан аһыы утахха умса түһэн, кыһыыларын-абаларын онон таһааран эрэллэр, онтон сылтаан куһаҕан түбэлтэ эрэ тахсыбатар ханнык», — диэн этэллэр бааҥҥа уочаракка турар дьон.

Куорат кыра буолан, тэрилтэлэрин, чуолкай ааттарын этиэхтэрин туттуннулар. Ол эрэн, көхтөөх дьон туспа бөлөх тэринэн, баантан эмсэҕэлээбит дьон илии баттааһынын хомуйан, испииһэк оҥоро сылдьаллар. Хоруупсуйаны утарар, сүтэрбит үпкүн төнүннэриэххин баҕарар буоллаххына, кэлэн илиигин баттаа диэн ыҥырыы сурук социальнай ситимнэринэн күүскэ тарҕанар.

Илии баттааһын Дьокуускай куорат дьаһалтатын дьиэтигэр 2 этээс актовай саалатыгар бүгүн от ыйын 12 күнүгэр киэһэ 18 ч. уонна сарсын, от ыйын 13 күнүгэр күнүс 16-18 ч. диэри ыытыллыаҕа. Миитин от ыйын 27 күнүгэр күнүс 15 ч. Ленин болуоссатыгар былааннанар. Эбии ыйытыылардаах дьоҥҥо тэрийэр бөлөҕү кытта билсэр төлөпүөн: 89245999468 (whats upp).

Ону таһынан, от ыйын 13 күнүгэр күнүс 16 ч. Дьокуускай куорат дьаһалтатын дьиэтигэр 2 этээс актовай саалатыгар судаарыстыбаннай тэрилтэ бэрэстэбиитэллэрэ кыттыылаах мунньах буолуоҕа диэн тэрийээччилэр этэллэр.

Марианна Тыртыкова, «Саха сирэ», edersaas.ru

 

#бүгүн: 1
1
0

Сайт матырыйаалларын ааптар көҥүлэ суох ылар бобуллар.