Саха өрөспүүбүлүкэтин Бырабыыталыстыбатын Бэрэссэдээтэлэ Владимир Солодов ахсынньы 8 күнүгэр Таатта улууһун Кыйытыгар саҥа хотон арыллыытыгар сырытта.
edersaas.ru
«Арыылаах» бааһынай хаһаайыстыба (баһылыкТимофей Барбасытов) барыта 56 ынах сүөһүлээх, ол иһигэр 25 ыанар ынахтаах итиэннэ 107 сылгылаах. Сылга 1,8 туонна ынах этин, 11,8 туонна убаһа этин соҕотуопкалыыр. Сүөһүтүн эрэллээхтик элбэтэр хаһаайыстыба саҥа хотон тутан үлэҕэ киллэрдэ.
— Таатта улууһа төрүт үгэһи өрө тутан, тыа хаһаайыстыбатын сайыннарыыга таһаарыылаахтык үлэлиир, — диэтэ Владимир Солодов итиэннэ «Арыылаах» бааһынай хаһаайыстыба граҥҥа тирэҕирэн хотон туттубута үлэлиэн-хамсыан баҕарар дьоҥҥо үчүгэй холобур буоларын бэлиэтээтэ. Ил Дархан Айсен Николаев сүөһү-сылгы ахсаанын элбэтэр уонна олохтоох аһы-үөлү оҥорууну сайыннарар туһунан ыйаах таһаарбытын эттэ.
Улуус баһылыга Михаил Соров улуус тоҕус тыһыынча олохтооҕо тыа хаһаайыстыбатын эйгэтигэр үлэлээн-хамсаан, онтон дохуоттанан олороллорун кэпсээтэ. Таатта этин уонна үрүҥ аһын хаачыстыбата ырыынакка сыаналанарын уонна алааскаа үүнэр от араас туһалаах битэмииннээҕин бэлиэтээтэ. Премьер-миниистир салгыы Дэбдиргэ нэһилиэгэр 120 миэстэлээх саҥа таас оскуола аһыллыытыгар сырытта.
Евдокия Слепцова, «Саха сирэ» хаһыат, edersaas.ru